ने. सं. ११४४ ञलाथ्व नवमी -

मूल पुजारी रोबोट !

मानव यन्त्र अर्थात रोबोट । थुकिया बारे झीसं आपालं न्यना तयागु दु । रोबोट छगू अज्याःम्ह मानव यन्त्र खः, गुम्हेसिनं मनुखं थें हे माःगु सकतां ज्या यायेफु । रोबोटं थथे यात, रोबोटं अथे यात । अज्याःम्ह रोबोट दयेकल, थज्याःम्ह रोबोट दयेकल । रोबोटं आः थज्याःगु ज्या याइ, अज्याःगु ज्या याइ धइगु समाचार झीसं यक्व हे न्यना वयाच्वनागु खः ।

थ्व हे झ्वलय् आः देगलय् पुजारीया थाय् नं रोबोटं कयाहःगु दु । प्रविधिया जगतय् विश्वय् हे न्ह्यःने लानाच्वंगु जापानया छगः प्यसः दँ स्वयां पुलांगु बौद्ध देगःया मू पुजारीया रुपय् रोबोटयात नियुक्त याःगु दु । खतुं रोबोटयात पुजारी नियुक्त याःगु विषयय् छुं विवाद नं ब्वलंगु खःसां उकियात कायम हे याःगु दु । जापानया क्योटोया कोदाइजी देगलय् रोबोटयात पुजारी नियुक्त याःगु खः ।

छम्ह वयस्क व्यक्तिया आकारय् दुम्ह रोबोट पुजारीं थ्व हे दँनिसें देगलय् थःगु ज्या न्ह्याकूगु खः । थुम्ह पुजारी रोबोटं द्यःयाथाय् वइपिं भक्तजनतय्त दया व करुणाया सन्देश बीगु ज्या याइसा देगलय् च्वंपिं मेमेपिं मानव पुजारीं थ्व हे रोबोट पुजारीया सहयोगीकथं ज्या यानाच्वंगु दु ।

देगःया छम्ह पुजारी थेनसे गाटों थ्व रोबोट गबलें मसीगु व ईनापनापं छुं सुधार जुया वनाः हिउपाः नं वइगु विश्वास याःगु दु । थुम्ह रोबोट ओसाका विश्वविद्यालयया नांजाःम्ह रोबोटिक्सया पुचलं १० गू लाखय् निर्माण याःगु खः ।