सुडानय् झडप, ८३ म्ह सित

एजेन्सी – सुडानया पश्चिमी डार्फर राज्यया राजधानी एल जेनिनाय् सशस्त्र विद्रोहीतय्सं याःगु छगू आक्रमणय् लानाः ८० म्हं मल्याक मनूत सीगु दु। सुडानया राज्यपाखें संचालित समाचार संस्था सुना न्यूज एजेन्सीया कथं वंगु शनिवाः निसें सुरु जूगु थ्व झडपय् लानाः ८३ म्हेसिया ज्यान वनेधुंकूगु दुसा मेपिं १६० म्ह घाःपाः जूगु दु ।

‘शनिबार सुथं निसें एल जेनिना शहरय् जूगु रक्तपातपूर्ण घटना अझं जारी जुयाच्वंगु दनि । आःतकया तथ्यांक कथं ८३ म्ह सीगु व १६०म्ह घाःपाः जूगु सीदुगु दु ।’ शनिवाः निसें न्ह्याःगु थ्व संघर्ष पनेगु निंतिं पश्चिमी डार्फरय् शनिवाःनिसें हे निषेधाज्ञा जारी यानातःगु दु। अथेहे सुरक्षा बल व मेडिकल सेवा सहितया यातायात साधन उपलब्ध याकेत नं सरकारयात इनाप याःगु दु ।