
बिबिसी- विश्वब्यापी महामारी कथं न्यनाच्वंगु कोरोना भाइरसविरुद्ध खोप दयेकेगु ज्या नं तीव्र गतिं न्ह्याः वनाच्वंगु दु । थ्व हे झ्वलय् चीनय् दयेकाच्वंगु छगू खोपया भाः क्वःछिउगु दु । चीनया सिनोफार्मं दयेकाच्वंगु थ्व खोपया भाः थ्यंमथ्यं झिंन्याद्वः तका (१४० डलर) क्वःछिउगु दु । भाः क्वःछिउसां थ्व खोपया परीक्षण धाःसा न्ह्यानाच्वंगु दनि ।
विकासक्रमय् दुगु थ्व खोपया तस्वीर छुं न्हि न्ह्यव चिनियाँ सरकारी संचार माध्यमय् नं पिदंगु खः । विश्वन्यंकं यानाः खुगू खोपया परीक्षण अन्तिम चरणय् थ्यनाच्वंगु दु । थथे अन्तिम चरणय् थ्यनाच्वंगु खोप मध्ये बछि चिनियाँ खोप हे लानाच्वंगु दु ।
तर न्ह्यइपुगु खँ छु धाःसा गुलि खोप परीक्षण यायेमाःगु खः उलि चीनय् परीक्षण यायेगु अवस्था हे मदु । चीनय् कोरोना भाइरस संक्रमण सफलतापूर्वक नियन्त्रण यायेधुंकूगुलिं थन परीक्षण यानाः लिच्वः सीदइगु अवस्था मदु । उकिं चिनियाँ खोप परीक्षणया निंति चीनं उच्च जोखिम दुगु देय्त मालाच्वंगु दु ।
‘फुक्कं खोप दयेकाच्वंपिंसं हजारौं मनूतय्त यायेमाःगु स्वंगूगु चरणया परीक्षणया निंतिं कोरोना भाइरस संक्रमण उच्च दुगु थाय् मालाच्वंगु दु’ हङकङ युनिभर्सिटी पब्लिक स्कुल अफ हेल्थया प्राध्यापक बेन काउलिङ धयादीगु दु, ‘तर जितः ताः स्वंगूगु चरणय् परीक्षण जुयाच्वंगु खोपत प्रभावकारी जुइगु यक्व व बांलाःगु सम्भावना दु ।’
चीनया छम्ह वरिष्ठ स्वास्थ्य अधिकारीं वंगु महिनां निसें चीनया प्रमुख सरकारी कर्मचारीतय्त खोपया गोप्य परीक्षण यानागु खँ धयादीगु दु ।नेशनल हेल्थ कमिशनया जेङ जोङ्वेइं सरकारी टिभीइ न्ववासें थःपिंसं आपतकालीन अधिकार छ्यलाः सीमा लागाय् विकासक्रमय् दुगु खोप बियागु जानकारी बियादीगु खः । चीनं आः युएई, पेरु व अर्जेन्टिनाय् नं हजारौं मनूतय्त आधिकारिक रुपं हे खोपया परीक्षण यानाच्वंगु दु । प्राध्यापक काउलिङ वइगु डिसेम्बरय् छुं खोपत बजारय् वयेफुगु खँ धयादीगु दु, तर थ्व तःधंगु ल्याखय् वइ वा मवइ धयागु धाःसा वय्कलं नं धायेमफु ।
LEAVE YOUR COMMENTS