चेल्सी व आर्सनलया विजय

लन्दन (एजेन्सी) – इंग्लिश प्रिमियर क्लब चेल्सी व आर्सनल थःथःगु कासा त्याकाः काराबाओ कप फुटबलया प्यंगूगु चरणय् दुहां वंगु दु। बुधवाः चान्हय् जूगु स्वंगूगु चरणया कासाया चेल्सीं बाम्सलेयात ६-०या तःधंगु गोल अन्तरं बुकूगु खः । चेल्सीया निंतिं थुगु सिजनय् जक क्लबय् आवद्ध जूम्ह जर्मन कासामि काभ हाभार्टं ह्याट्रिक याःगु खः । हाभार्टं कासाया २८, ५५ व ६५ औं मिनेटय् गोल यानाः ह्याट्रिक याःगु खः ।

अथे हे चेल्सीया निंतिं मेगु गोल टी अब्राहमं १९, रोस बार्कलं ४९ औं व ओलिभर गिरोउडं ८३ औं मिनेटय् याःगु खः । विजयलिसें अन्तिम १६ य्थ्यं गु चेल्सीं आः टोटेनहाम व लेयटन ओरिन्ट दथुइ जुइगु कासाया विजेता लिसे म्हिती ।

उखे आर्सनलं प्रिमियर लिगया प्रतिस्पर्धी लेस्टर सिटीयात २-० गोलं बुकल । आर्सनलया निंतिं छगू गोल उपहार वःगु खःसा मेगु गोल एडवार्ड एन्टिेकियां याःगु खः । न्हापांगु हाफ गोलरहित बराबरीइ क्वचाःगु कासाया निगूगु हाफय् लेस्टरया क्रिष्टियन फुसं ५७ औं मिनेटय् आत्मघाती गोल याःगु खः ।

वयां लिपा कासाया अन्तिम इलय् एन्टिकेयां गोल यायेवं आर्सनलं कासा २-० गोलं त्याकल । आर्संनलं आः अन्तिम १६ या कासाय् लिभरपुल व लिंकन सिटीया दथुइ जुइगु कासाया विजेता नापं म्हिती ।