ने. सं. ११४४ कौलाथ्व पारू - नःलास्वनेगु

आइसिसी टी–२० विश्वकप एशिया छनोट – नेपालं सिंगापुरयात बुकल

येँ (नेपालभाषा टाइम्स)- आइसिसी टि–२० विश्वकप एसिया छनोटया थःगु न्हापांगु कासाय् नेपालं सिंगापुरयात बुकूगु दु । टियू मैदानय् सोमवाः जूगु कासाय् नेपालं सिंगापुरयात च्यागू विकेटं बुकूगु खः ।

सिंगापुरं बिउगु १४६ रनया लक्ष्य ज्वनाः मैदानय् वःगु नेपालं १६.३ ओभरय् निगू विकेटया क्षतिइ लक्ष्य पुवंकूगु खः । नेपाःया निंतिं ओपनर कुशल भुर्तेलं दकलय् अप्वः ७४ रन दयेकूगु खः । भुर्तेलं च्यागू चौका व निगू छक्का थ्वाःगु खः । अथेहे आसिफ शेख २७ रन दयेकेगु झ्वलय् निगू चौका व छगू छक्का थ्वाःगु खः । कप्तान रोहित कुमार पौडेलं ३५ रन व कुशल मल्लं ६ रन दयेकूगु खः । पौडेलं निगू चौका व निगू छक्का थ्वाःगु खःसा मल्लं छगू छक्का थ्वाःगु खः । सिंगापुरया अनन्त कृष्ण व अक्षय पुरीं छगू छगू विकेट काःगु खः ।

टस त्याकाः न्हापां ब्याटिङ याःगु सिंगापुरं निर्धारित २० आभेरय् ९ विकेटया क्षतिइ १४५ रन दयेकूगु खः । सिंगापुरया निंतिं रोहन रंगराजनं ४६ रन, आर्यवीर चौधरीं ३७ रन व मनप्रीत सिंहं २४ रन दयेकूगु खःसा मेपिं कासामितय्सं धाःसा निगू अंकया रन दयेकेमफुत । नेपाःया अविनाश बोहरां स्वंगू विकेट काःगु खः । अथेहे सन्दीप लामिछाने, करण केसी व गुल्शन झां निगू निगू विकेट काःगु खः ।

पुचः ‘ए’ य् च्वंगु नेपालं छनोटया निगूगु कासा मंगलवाः मलेसियालिसे व बिहिवाः ओमानलिसे म्हिती । पुचःया निगू शीर्ष टिम सेमिफाइनलय् थ्यनी । अथेहे फाइनलय् थ्यंगु निगू टिम सन् २०२४ य् जुइगु टी–२० विश्वकपया निंतिं छनोट जुइ ।