शिरिष हिट चरणं हे पिने

जाकार्ताय् जुयाच्वगुं १८ औं एशियाली कासाय् नेपाःया कीर्तिमानी पौडीबाज शिरिष गुरुङ्ग बिहिबार जूगु १०० मिटर फ्रिस्टाइलय् हिट चरणं हे पिने लाःवंगु दु । ४७ म्ह कासामितय्सं ब्वति काःगु थुगु इभेन्टय् शिरिष ४०औं थासय् लाःगु खः । शिरिष १०० मि दूरी पार यायेत ५७.९२ सेकेण्ड ई काःगु खः।

अथेहे ५१ म्ह कासामितय्सं ब्वति काःगु ५० मिटर फ्रिस्टाइलय् शिरिष ४६ औैं थासय् लाःवंगु दु ।बिहिबाः हे जूगु मिस्तय् ५० मिटर बे्रस्टस्ट्रोकय् तिसा शाक्य २६ औं थासय् वःगु दु । ३० म्ह कासामितय्सं ब्वति काःगु थ्व इभेन्टय् तिसां दूरी पूवंकेत ३९.४६ सेकेण्ड काःगु खः ।

अथेहे ब्याडमिन्टनय् मिजंतय् डबल पाखे नेपाः अन्तिम १६य् थ्यंगु दु । विकास श्रेष्ठ व नविन श्रेष्ठया ज्वलिं बिहिबाः मंगोलियायात २-० सेटं बुकूगु खः। मंगोलिया २१-१२, २१-७ या सेटय् बूगु खः । मिश्रित डबलय् रत्नजित तामाङ–नंशलदेवी तामाङ इन्डोनेसियापाखें व जेसिका गुरुङ-दिपेश धामी हङकङया प्रतिस्पर्धीपाखें न्हापागुं चरणय् बूगु दु ।