जापान वनीपिं ज्यामितय् परीक्षा कार्तिकं

येँ – जापान सरकारं औपचारिक रुपं आप्रवासी ज्यामित दुत यंकेगु प्रक्रिया सुरु याःगु दु । जापान सरकारं थ्वयां न्ह्यः थीथी झिंप्यंगू क्षेत्रय् नेपाः लिसें गुंगू देशं विदेशी ज्यामि यंकेगु घोषणा याःगु खः ।जापानं न्हापांगु चरणय् यंकेत्यंपिं केयर गिभरतय् निंतिं थ्वहे वइगु कात्तिक १० निसें १२, १९ निसें २१ व २६ निसें २८ गते तक परीक्षा संचालन जुइगु जूगु दु ।

परीक्षाया निंतिं गुकथं आवेदन बीगु धयागु बारे वइगु असोज १५ गते दुने जानकारी बीगु खँ धाःगु दु । न्हापांगु चरणय् जापानं केयर गिभरय् ज्यामित यंकेगु तयारी याःगु खः । जापानय् रोजगारीया निंतिं योग्य जुइत जापानी भाय् व सीप परीक्षा पास यायेमाः ।

‘स्पेसिफाइड स्किल्ड वर्कस’ अन्तर्गत जापानय् नर्सिङ केयर गिभरय् वने चाहे जूपिं नर्सिङ केयर व जापानी भाय् परीक्षा पास यायेमाःगु जापानया स्वास्थ्य, श्रम तथा कल्याण मन्त्रालयं धाःगु दु । नर्सिङ केयर गिभरय् जापान वने चाहे जूपिंसं नर्सिङ केयर स्किल इभ्यालुएसन टेस्ट अन्तर्गत ६० मिनेटया ४५ गू न्ह्यसःया लिखित लिसः बीमाः ।

नर्सिङ केयर गिभरय् जापान वने चाहे जूपिंसं नर्सिङ केयर स्किल इभ्यालुएसन टेस्ट अन्तर्गत ६० मिनेटया ४५ गू न्ह्यसःया लिखित लिसः बीमाः ।

गुकी फन्डामेन्टल अफ केयरया १०, मेकानिज्म अफ द माइन्ड एण्ड बडीया ६, कम्युनिकेशन स्किलया ४, फिजिकल केयरया २० व प्रयोगात्मक अभ्यास अन्तर्गत न्यागू न्ह्यसःया लिसः बीमाः ।प्रयोगात्मक परीक्षा कम्प्यूटर प्रणाली –सिबिटी)या माध्यमं बीमाः । अथेहे परीक्षार्थीं नर्सिङ केयर जापानीज ल्यांग्वेज इभ्यालुएसन टेस्ट अन्तर्गत ३० मिनेटय् झिंन्यागू न्ह्यसःया लिसः बीमाः ।

गुकी टेक्निकल ट्रम्स अफ केयरय् ५, कम्युनिकेशन अफ केयरय् ५ व डकुमेन्ट अफ केयरय् ५ या १५ अंकया भाषा परिक्षा जुइ । भाषा व सीप परीक्षाया निंतिं द्वछि जापानी येन दस्तुर पुलेमाःसा परीक्षा जूगु लछिया दुने लिच्वः सार्वजनिक जुइ । म्होतिं नं ६० प्रतिशत ल्याः हःपिं परीक्षार्थी उत्तीर्ण जुइगु खँ जापानी श्रम मन्त्रालयं धाःगु दु ।

नेपाल सरकार व जापान सरकार दथुइ वंगु चैत ११ गते नेपाली श्रमिक यंकेगु सम्बन्धी सहयोग समझदारी –एमओसी)इ हस्ताक्षर जूगु खः । जापानं १४ गू कार्यक्षेत्रय् विदेशी श्रमिक यंकेगु नीति काःगु दु ।

जापानं कृषि, नर्सिङ केयर, सवारी साधन मर्मतसम्भार, खाद्य सेवा उद्योग, निर्माण उद्योग, खाद्य पदार्थ व पेय पदार्थया उत्पादन, आवास उद्योग, मेसिनरी पार्ट उद्योग, न्या लायेगु व न्या लहीगु उद्योग, औद्योगिक उपकरण उद्योग, इलेक्ट्रिक, इलेक्ट्रोनिक्स व सूचना प्रविधि उद्योग, बिल्डिङ सरसफाइ व्यवस्थापन, जहाज व जहाजया पाटपुर्जा उद्योग व हवाई उद्योगय् श्रमिकत यंकेत्यंगु दु ।

नेपाली श्रमिकतय्त १४ गुलिं कार्यक्षेत्रय् खुला याःगु दुसां छु छु क्षेत्रय् गुलि गुलि संख्याय् नेपाली श्रमिकया माग दुगु खः धयागु धाःसा निश्चित मजूनिगु खँ श्रम मन्त्रालयं धाःगु दु ।

सम्बन्धित बुखँ

LEAVE YOUR COMMENTS