नेपाः व जापानया तप्यंक हावाइ उडाना जुइगु

येँ – नेपाल व जापान दथुइ हवाई सेवा सम्झौता जुइगु जूगु दु । जापानया विदेशमन्त्री तारो कोनाया औपचारिक भ्रमणया झ्वलय् बुधवाः निगू देय् दथुइ सम्झौता जुइत्यंगु खः । परराष्ट्र मन्त्री प्रदीपकुमार ज्ञवाली व वय्कःया समकक्षी कोनो दथुइ थौं न्हिनय् मन्त्रीस्तरीय वार्ता लिपा उगु सम्झौता जुइ ।

अथेहे नेपाल व जापानया परराष्ट्र मन्त्रालय दथुइ ग्वाहालि प्रवद्र्धन यायेगु सम्बन्धी निगू पक्षीय परामर्श संयन्त्र दयेकेगु खँ धाःगु दु ।
परामर्श संयन्त्र दयेकेगु सम्बन्धी समझदारी पतिइ हस्ताक्षर याइगु खँ धाःगु दु । मन्त्री ज्ञवालीया ब्वनाय् विदेशमन्त्री कोनो झिंच्याम्ह प्रतिनिधि मण्डलया नेतृत्व यानाः निन्हुया औपचारिक भ्रमणय् वइगु खँ धाःगु दु ।

मन्त्री कोनोया भ्रमणं नेपालय् जापानी लगानी, पर्यटक प्रवद्र्धन लिसें जापानया श्रम बजारय् नेपाःया श्रमिक छ्वयेगु फलदायी जुइगु विश्वास नेपालं यानातःगु दु । वार्ताया झ्वलय् नेपाल वायुसेवा निगमया विमानयात जापानया ओशाका व नारिता विमानस्थलय् शीघ्र उडान व अवतरण यानाः निगू देय् दथुइ तप्यंक सम्पर्क जुइगु, नेपाःया सामाजिक व आर्थिक विकासय जापान सरकारपाखें चूलाइगु ग्वाहालि आदि विषयसं सहलह जुइगु खँ धाःगु दु ।

नेपाः व जापान दथुइ तप्यंक उडान न्ह्यायेवं नेपाल भ्रमण वर्ष २०२० यात सफल यायेत अप्वः स्वयां अप्वः जापानी पर्यटक नेपाल दुकायेत ग्वाहालि जुइगु खँ धाःगु दु । नेपाः भ्रमणया झ्वलय् जापानी प्रतिनिधि मण्डलं राष्ट्रपति विद्यादेवी भण्डारी व प्रधानमन्त्री केपी ओलीलिसे बिस्कं बिस्कं नापलाइगु ज्याझ्वः दु ।

जापानी विदेशमन्त्रीया नेपाः भ्रमणया झ्वलय् नेपाल सरकारया विकास निर्माणया प्राथमिकता, आर्थिक विकासया निंतिं सरकारं क्वःछिनातःगु प्राथमिकताया क्षेत्र विकासया बारे नं सहलह जुइगु खँ धाःगु दु । नेपालं कृषि क्षेत्रया विकास व आधुनिकीकरण, ऊर्जा उत्पादन, पूर्वाधार विकास, पर्यटन लिसे मानव स्रोतया विकासय् जापानी सरकारया ग्वाहालि आदिया म्हसिकेगु बारे नं सहलह जुइगु खँ धाःगु दु । नेपाः व जापानया दथुइ खुइ स्वदँ न्ह्यः कुटनीतिक सम्बन्ध स्थापना जूगु खः ।

सम्बन्धित बुखँ

LEAVE YOUR COMMENTS