खाडीइ वनेत स्वास्थ्य परीक्षणय् न्हूगु नियम

येँ – खाडी देय्तय्सं वैदेशिक रोजगारय् वइपिं नेपाली ज्यामित स्वास्थ्य परीक्षण प्रक्रियाय् हिउपाः हःगुलिं छवाः न्ह्यवनिसें स्वंगू थीथी देशय् वनेमाःपिं नेपाली ज्यामित वनेगु दिउगु दु ।गल्फ कोअपरेशन काउन्सिल (जीसीसीं) साउदी अरेबिया, ओमान व बहराइन वने चाहे जूपिंसं विदेशी मुद्राय् खाता चायेकाः १० डलर पुलाः जक अनलाइनपाखें स्वास्थ्य परीक्षण यायेमाःगु प्रावधान लागू याःगु खः ।जीसीसीं साउदी अरेबिया, ओमान व बहराइन वनीपिं नेपाली ज्यामितय् स्वास्थ्य परीक्षण याना वयाच्वंगु संस्थाया अनुमति खारेज यानाः वंगु फागुन १७ गते निसें अनलाइनपाखें हे फारम भरे यानाः स्वास्थ्य परीक्षणया ई व सिट सुरक्षित यायेगु न्हूगु व्यवस्था लागु याःगु खः । नेपाल वैदेशिक रोजगार व्यवसायी संघया अध्यक्ष रोहन गुरुङं विदेशी मुद्राय् शुल्क पुलेमाःगु व्यवस्थाया कारणं समस्या वःगु खँ कनादीगु दु ।वय्कलं बिबिसीलिसे खँ ल्हासें धयादीगु दु, ‘स्वास्थ्य परीक्षण यायेत अनलाइनमार्फत दर्ता यानाः क्रेडिट कार्डपाखें १० डलर शुल्क पुलेमाःगु न्हूगु नियम जीसीसीं हःगु दु ।

तर थुपिं देशय् वनीपिं नेपाली ज्यामितय् नामय् डलर खाता नं मदु, अले राष्ट्र बैंकया अनुमति मदयेकं विदेशय् छ्वये नं फइमखु ।’जीसीसीं अनलाइनय् न्ह्यथनातःगु छगू दर्जन स्वास्थ्य संस्था मध्ये न्ह्यागुसां छगू ल्ययाः स्वास्थ्य परीक्षण यायेमाःगु व्यवस्था यानातःगु दु । अथेहे स्वास्थ्य परीक्षणया निंतिं थांैकन्हय् पुला वयाच्वंगु न्याद्वः व न्यासः तका शुल्क नं कायम हे यानातःगु दनि । मेखे सरकारं धाःसा जीसीसीं जारी याःगु न्हूगु नियम बारे थःपिंत जानकारी मदुगु खँ धाःगु दु । श्रम तथा रोजगार मन्त्रालयया विशेष समिति सदस्य सचिव अर्जुनप्रसाद खनालं बिबिसीयात धयादीगु दु, ‘झीथाय् अज्याःगु निर्णय जूगु वा झी लिसे सम्झौता यानाः थ्व निर्णय लागू याःगु मखु । श्रम मन्त्रालय व स्वास्थ्य मन्त्रालयं स्वास्थ्य परीक्षण शुल्क सम्बन्धी यानातःगु निर्णय स्वयां अप्वः शुल्क कायेदइमखु ।’थगुने नं स्वास्थ्य परीक्षण यायेत १० डलर पुलेमाःगु नियम लागू यायेत स्वःगु खः, तर नेपालीतय्सं विदेशी मुद्राया खाता चायेकेगु व्यवस्था मदु धासें श्रम मन्त्रालययं उबलय् थ्व विवाद ज्यंकूगु खः ।न्हूगु नियमं वैदेशिक रोजगारय् वनीपिं ज्यामितय्त नं थप आर्थिक भार लाइगु जूगु दु ।