बहमासय् आःतकया निगूगु तःधंगु चक्रावत

तसकं शक्तिशाली चक्रावत ‘डोरियन’य् लानाः क्याबियन द्वीप बहमासय् तःधंगु क्षति याःगु दु । थ्व समुद्री तुफानं छेँया पौ ब्वयेका यंकूगु दुसा थाय्थासय् खुसिबाः वयाच्वंगु दु । बुलुहुँ न्ह्याः वयाच्वंगु थ्व चक्रावत न्यागूगु श्रेणीया तूफान जूगु खँ धाःगु दु । थ्व चक्रावतयात आःतकया निगूगु दकलय् तःधंगु एटलान्टिक समुद्री तुफान धाःगु दु ।

थ्व चक्रावतया झ्वलय् २८५ किमि प्रति घन्टाया ल्याखं फय् सनाच्वंगु दु । तूफानया कारणं गुलिखे थासय् समुद्री लःबू हे न्हय्गू मिटर तजाः जुइक वःगु खनेदुगु खः । थ्व तूफान नौ किलोमिटर प्रतिघन्टाया गतिं पश्चिम पाखें न्ह्याःवंगु दु । थुकिं पूर्वी अमेरिकी तटय् नं प्रभावित यायेफुगु खँ धाःगु दु । अमेरिकी राज्य फ्लोरिडा, जर्जिया, नर्थ एन्ड साउथ क्यारोलिनाय् आपतकालिन घोषणा यायेधुंकूगु दु ।

थ्व तूफानं प्रभावित जूगु द्वीपय् मतया आपूर्ति बन्द जुइधुंकूगुलिं थनं तसकं म्हो जक जानकारी वयाच्वंगु खँ धाःगु दु । थनया एबैको द्वीप लखय् डुबे जुइधुंकूगु अपुष्ट खबर नं वयाच्वंगु खँ बिबिसीं धाःगु दु ।सरकारी अधिकारीतय्सं एबैकोय् गाडी डुबे जुइकथं लः जायेधुंकूगु दुसा यक्व हे छेँया पौ नं ब्वयेका यंकेधुंकूगु दु ।

बहमासया पर्यटन व उड्डयन मन्त्रालयया महानिर्देशक जोय जिबरिलुं आइतवाः हे चक्रावत थ्यनेवं धाःगु दु, ‘थ्व तसकं विध्वंशक जुइ । सम्पत्ति व भवनयात तःधंगु नोक्सान जूगु दु, सौभाग्यं धायेमाः कि सुं मनूया ज्यानया क्षति जूगु खबर मवःनि ।’सरकारं थ्व चक्रावत वइगु जुइवं झिंप्यंगू राहत शिविर चायेकाः उद्धार ज्या न्ह्याकूगु खः ।