वडा ज्याकुथिइ तालं, अनिश्चितकालीन न्हूसतक बन्दया तयारी

येँ (नेपालभाषा टाइम्स)-थनया न्हू सतकय् पार्किङ निषेध याःगुलिं तम्वःपिं स्थानीय व्यापारीतय्सं मनपा २२ वडा ज्याकुथिइ तालं ग्वयाः लुखाय् हाकुगु ब्यानर यखाना बिउगु दु । वडा ज्याकूया मू लुखा बन्द यासें अन ‘निःशुल्क पार्किङ व्यवस्था या, निरंकुश तानाशाही मेयर बालेन मूर्दावाद, व्यापार व्यापारी विस्थापन यायेगु ज्या बन्द या, परम्परागत पुलांगु व्यापारिक क्षेत्रया संरक्षण या’ धकाः च्वयातःगु हाकुगु ब्यानर यखाया बिउगु खः ।

ब्यानर खाः वःगु इलय् वडा अध्यक्ष चिनीकाजी महर्जन समेत पिने लाःगु खःसा वय्कलं मनपां याःगु गलत निर्णयं यानाः थौं थःगु हे वडावासीतय्सं थःगु हे ज्याकुथिइ तालाबन्दी यातं नं थः मूकदर्शक जुयाच्वने माल धकाः दुःख प्वंकादीगु दु ।

थ्वहे झ्वलय् मनपा बालेन साहं न्हू सतक लागाय् आकाझाकां पार्किङ बन्द यानाः खुला मञ्चय् अण्डर ग्राउण्ड पार्किङ दयेकेगु रणनीति दयेकूगु आशंका याना हःगु दु । न्हूसतक थेंज्याःगु थासय् पार्किङ यायेगु थाय् मंत धाःसा पीडित व्यावसायी व छेँथुवाःतय्सं खुलामञ्चय् जूसां पार्किङ दयेके माल धकाः माग याना हइगु व वयां लिपा थःगु योजना कथं खुला मञ्च स्यंकाः पार्किङ दयेकेगु ग्वसाः मेयर साहं यानाच्वंगु आशंका खुलामञ्च बचाउ अभियन्तातय्सं याना हःगु दु ।

थ्वहे झ्वलय् पार्किङ निषेध विरुद्ध म्हिगः वडा ज्याकुथिइ तालं ग्वःपिं सामाजिक व व्यापारिक संस्थातय्सं थौं वृहत् ¥याली पिकायेगु ग्वसाः दयेकूगु दु । कन्हय् मंगलवाः शनी ५ः३० बजे १ घन्टा ब्ल्याक आउट यायेगु, बुधवाः मोटरसाइकल ¥याली पिकायेगु, विहीवाः (माघ १८ गते) ११ बजेनिसें बजाः बन्द यायेगु व १९ गते शुक्रवाःनिसें अनिश्चितकालीन बन्द यायेगु कार्यक्रम दयेकूगु दु ।