मनकामना द्यःया देगः तयार जुल
येँ – गोरखा जिल्लाया नांजाःगु मनकामना देगः पुनःनिर्माण यायेगु ज्या क्वचाःगु दु । २०७२ साल बैशाख १२ गोरखा केन्द्रविन्दु जुयाः वःगु विनाशकारी तःभुखाचं देगः क्षति जूगु खः । देगः क्षति जुइवं उगु हे दँय् क्षमा पुजा यानाः देगः पूवंक थुनाः पुनःनिर्माण याःगु खः ।
देगः पुनःनिर्माण समितिया संयोजक नरेन्द्रबाबु श्रेष्ठया कथं देगःया गजू, पौ, मूलुखाय् लुँया जल तयाः पुरातत्व विभागं क्वःछिउगु मापदण्डकथं हे देगः निर्माण यायेगु ज्या जूगु दु । देगः पुनःनिर्माणय् सिमेन्ट, डन्डी थेंज्याःगु आधुनिक निर्माण सामग्री छुं नं प्रयोग मयासे पुलांगु हे प्रविधिपाखें देगः निर्माण यानागु वय्कलं कनादिल ।
देगः पुनःनिर्माणया निंतिं नेपाल सरकारपाखें निक्वः यानाः मुक्कं प्यंगू करोडतका प्राप्त जूगु व ल्यं दुगु दक्वं भक्तजनपाखें संकलन जूगु नं वय्कलं कनादिल । ‘देगः पुनःनिर्माणय् गुलि खर्च जुल धकाः आः हे धाये फइगु अवस्था मदु । अय्नं जिमिगु अनुमानकथं १३ गू करोड तका खर्च जूगु दयेमाः’ समितिया संयोजक श्रेष्ठं धयादिल, ‘देगः निर्माणया झ्वलय् लुँ जक १२ किलो खर्च जूगु दु ।
देगलय् मूलुखा तयेगु ज्या क्वचायेधुंकूगु दु, देगः जःखः नं बांलाकेगु ज्या जुयाच्वंगु दुसा पश्चिमपाखे भ्यसे लूगु जमिनय् पःखाः ग्वयेगु ज्या ल्यं दनि ।’मेमेगु देगलय् लुँया जलप तइगु इलय् नाइट्रिक एसिडया प्रयोग याइगु खःसां मनकामना द्यःया देगलय् लुँया जलप तइगु इलय् थःपिंसं पुलांगु हे प्रविधिकथं चि, पाउँ व अप्पा चू प्रयोग यानागु वय्कलं धयादिल ।
देगः पुनःनिर्माणया ज्या क्वचाःसां देगलय् गबलय् निसें पुजा शुरु यायेगु धइगु बारे आतक छुं नं क्वःमिउगुनिगु मनकामना द्यःया मू पुजारी इन्सान थापां कनादिल । थौंकन्हय् देगःलिक्कसं चिकूगु थाय् छगू दयेकाः पुजा यानाच्वंगु दुसा थुकी समस्या जुयाच्वंगु वय्कलं धयादिल ।
मनकामना मन्दिर व्यवस्थापन समितिया बैठक च्वनाः न्हूगु देगः गबलय्निसें चायेकेगु धकाः निर्णय याइगु वय्कलं धयादिल ।
भारत लगायत युरोपेली देशं तकं भक्तजनत वइगु मनकामनाय् दछिया दुने झिंनिगू लाख स्वयां अप्वः भक्तजन वयेगु याः ।
LEAVE YOUR COMMENTS