छत्रपातिइ अक्सिजन उत्पादन

येँ- छत्रपाति निःशुल्क चिकित्सालयय् अक्सिजन उत्पादन शुरु जूगु दु । चिकित्सालयय् जडान यानातःगु १०० सिलिन्डर क्षमताया अक्सिजन प्लान्टपाखें अक्सिजन उत्पादन यायेगु शुरु जूगु खः ।

उर्जा, जलस्रोत व सिँचाइ मन्त्री पम्फा भुसालं वंगु शनिवाः जूगु छगू ज्याझ्वःया दथुइ चिकित्सलायया अक्सिजन प्लान्टया उलेज्या यानादीगु खः । ज्याझ्वलय् नवासें मन्त्री भुसालं थौं स्वयां ६५ दँ न्ह्यः स्थानीय जनसमुदाययात स्वास्थ्य सेवा बीगु ल्याखं स्थापना जूगु चिकित्सालय थौंया इलय् तक थ्यंगु अवस्थाय् छगू अत्याधुनिक व सुविधा सम्पन्न अस्पतालया रुपय् थःत परिचित यानाः संचालन यानाच्वंगु खँय् लसता प्वंकादिल ।

जनताया छेँय् छेँय् थ्यनीगु सिंहदरवार धकाः देय् संघीय संरचनाय् वनेधुंकाः स्वंगु्लिं तहया सरकार दयेकेगु ज्या जूगु दु धासें मन्त्री भुसालं धयादिल, ‘कार्यपालिका, व्यवस्थापिका, व न्यायपालिका सहितया अधिकार सम्पन्न स्थानीय सरकार महानगरपालिका जूगु दु । थुकिया उद्देश्य धइगु हे आपाः स्वयाः आपाः सुविधा थनया जनताया छेँखाय्तक थ्यंकेगु खः ।’

येँ महानगर देय्या राजधानी नं जूगुलिं पालिकां थःगु हे बिस्कं अस्पताल, मेडिकल कलेज, इन्जिनियरिङ कलेज, ज्येष्ठ नागरिक, मस्त व अपांगता जूपिंत बिस्कं सेवा बी फइकथंया केन्द्र निर्माण यायेमाःगु खँय् नं वय्कलं बः बियादिल । हेल्ग बे्रथ नेपालया फण्ड रेजर इन्जिनियर सोनिका मानन्धरं अक्सिजन प्लान्टया निंतिं आवश्यक ध्यबाः बाःछिया दुने ८० प्रतिशतं मल्याक फण्ड रेज यानागु जानकारी बियादिल ।

दया फाउण्डेसनया संस्थापक कृपा माथेमां शिक्षा, स्वास्थ्य व सम्पदाय् ग्वाहालि यायेगु संस्थाया नीतिकथं हे चिकित्सालयं डेंगु व कोभिडया महामारीया इलय् म्हितूगु भूमिकायात कयाः च्वछायादिसें उकिया हे कदर स्वरुप अक्सिजन प्लान्ट स्थापना यायेत संस्थापाखें ग्वाहालि यानागु खँ कनादिल ।

येँ महानगरपालिका १७ वडाअध्यक्ष नविन मानन्धरं एकता हे बल खः धासें २०१३ सालय् माउ बद्रिं खंगु म्हगसयात सकसिनं उतिकं साथ बिया यंकूगुलिं हे चिकित्सालय थौंया अवस्थाय् तक थ्यने फुगु खः धयादिल ।

ज्याझ्वःया सभापतिया थासं चिकित्सालयया अध्यक्ष डा. मनोजमान श्रेष्ठं ग्वाहालि यानादीपिं सकलें नापं थीथी संघसंस्थायात सुभाय् देछानादिसें न्हिथं ३५ सिलिन्डरपाखें थौं न्हिं १०० गः सिलिन्डर अक्सिजन उत्पादन यायेत चिकित्सालय सफल जूगु खँ कनादिल । हेल्प बे्रथ नेपाल व दया फाउण्डेसनया विशेष ग्वाहालिं चिकित्सालयं न्हिं १०० सिलिन्डर अक्सिजन उत्पादन याये फइगु क्षमताया प्लान्ट स्थापना याःगु खः ।