ब्रेक्जिट : नेपाःयात लबः दइगु सम्भावना

येँ – ४७ दँ लिपा बेलायत युरोपियन युनियनपाखें अलग जुइवं आः छु जुइ धइगु भयं अन च्वनाच्वंपिं लखौं नेपाःमित नं चिन्तित जूगु दु । बेलायतय् करिब छगूत्या लाख नेपाःमि बसोबास यानाच्वंगु दु । युरोपियन युनियनपाखें बेलायत अलग्ग जुइवं अनया आर्थिक स्थितिइ हिउपाः वइगु जूगुलिं खास यानाः व्यापार व्यवसाय यानाच्वंपिं नेपाःमित आः छु जुइ धइगु ग्याःचिकुं ग्रस्त जूगु खः । युरोपियन युनियनं बेलायत अलग्ग जुइवं बेलायत युरोपं वइगु सामानय् कर काइगु व युरोपीय देतय्सं नं बेलायती सामानय् कर काइगु जूगुलिं बेलायत व युरोप दथुइ कारोवार याइपिं व्यापारीत चिन्तित जुयाच्वंगु दु ।

नेपाःमित चिन्तित जूसां ब्रेक्जिटपाखें नेपाः व नेपाःमितय्त धाःसा सामान्यतया फाइदा हे जुइगु खँ बीबीसी लगायतया सञ्चार माध्यमतय्सं धायेगु याना हःगु दु । ब्रेक्जिट लिपा बेलायतय् च्वनाच्वंपिं आपालं युरोपियन नागरिकत देय् त्वःताः पिहां वनीगु जूगु दु । थुकिं यानाः अन छेँ दनीगु सम्भावना दु । अथे हे युरोपं बेलायतय् आखः ब्वं वइपिं विद्यार्थीत आः कम जुइगु जूगुलिं थ्व खालीगु थासय् नेपाः थेंज्याःगु देय्या विद्यार्थीतय्सं अवसर प्राप्त यायेफु ।

बेलायती विद्यार्थीत बेलायतया थीथी विश्वविद्यालयया तःधंगु आर्थिक स्रोत जुयाच्वंगु दु । उकिं बेलायतं अध्ययन सिधयेकाः नं निदँ तक बेलायतय् ज्या याये दइगु व्यवस्था घोषणा याःगु दु । अनया सरकारं हःगु आप्रवासन सम्बन्धी न्हूगु नीतिं डाक्टर, इन्जिनीयर, नर्स थेंज्याःगु पेशाया मनूत बेलायत वनेत अःपुइगु जूगु दु ।

दकलय् तःधंगु खँ ला बेलायत ईयुपाखें अलग्ग जुइवं नेपाःया वायुसेवायात ईयुं तयातःगु प्रतिबन्ध बेलायतय् लागू जुइ मखुत । थुकिं यानाः नेपाःया विमान बेलायत तक ब्वये फइगु जूगु दु । खतुं इयुं अलग जूसां नं दछि तक बेलायतं ईयुया हे नियम पालना यायेमाः धइगु प्रावधान दु । बेलायतय् अझ नं थ्व मुद्दायात मनूतय्सं शंका यानाः स्वयाच्वंगु दनि ।

भूपू गोर्खाया मुद्दा ध्याकुनय्

बेलायतय् च्वनीपिं नेपाःमितय् अप्वः प्रतिशत गोर्खा सैनिकतय्सं कःघानाच्वंगु दु । अनया गोर्खा सैनिकयात ब्रेक्जिटपाखें लबः वा द्यापं छुं हे जुइगु सम्भावना मदु । अथे खःसां वंगु छुं दँ न्ह्यवंनिसें बेलायती राजधानी ब्रेक्जिट मुद्दाय् तक्यनाच्वंगु कारणं भूतपूर्व सैनिकतय्सं ल्ह्वना वयाच्वंगु समान पेन्सनया आन्दोलन धाःसा मुक्कं हे ध्याकुनय् लाः वंगु दु । बेलायतया छुं नं सरकारी निकायं थुकी ध्यान बी मखनाच्वंगु व सुना नं थ्व मुद्दायात सम्बोधन तकं मयाःगु कारणं समान पेन्सनया मुद्दा न्ह्याये फयाच्वंगु मदुनि । बेलायतय् मेगु छुं ई अझ नं बे्रक्जिट हे मू राजनीतिक विषय जुइगु जूगुलिं भूपू गोर्खाया मुद्दा अझं न्ह्यःने वयेत थाकुइगु अनुमान जुयाच्वंगु दु ।

सम्बन्धित बुखँ

LEAVE YOUR COMMENTS