अमेरिकां नीदँ लिपा अफगानिस्तानया बग्राम एयरफिल्ड त्वःतीगु

एजेन्सी( अमेरिकी सेनां थ्यंमथ्यं नीदँ लिपा अफगानिस्तानया बग्राम एयरफिल्ड त्वःतेत्यंगु दु । अमेरिकाया वरिष्ठ अधिकारीतय्सं धाःकथं बग्राम एयरफिल्ड ‘अफगानी राष्ट्रिय सुरक्षा एवं रक्षा बल’यात हस्तान्तरण याइगु जूगु दु ।

अन्तर्राष्ट्रिय समाचार एन्जेसी रोयटर्सया कथं शनिवाः औपचारिक ज्याझ्वः यानाः सैन्य क्याम्प हस्तान्तरण याइ । अधिकारीतय्सं बिउगु जानकारीकथं बग्राम एयरफिल्डया रक्षाया अधिकार अफगानिस्थानय् दुम्ह अमेरिकाया शीर्ष जनलर ओस्टिन मिलरयाके दइ ।

बग्राम एयरफिल्ड अफगानिस्तानया चरमपन्थी संगठनविरुद्ध ल्वायेत दयेकातःगु थाय् खः । बग्राम एयरफिल्ड तालिवान व अल–कायदालिसे ल्वायेत अमेरिकी सेनां नीदँ न्ह्यवंनिसें छ्यलावयाच्वंगु थाय् खः । बग्राम एयरफिल्ड त्वःतेवं आः दक्व अमेरिकी सेना अफगानिस्तानं लिहाः वनीगु विश्लेषकतय्सं धाःगु दु । अमेरिकाया राष्ट्रपति जो बाइडेनं सेप्टेम्बरया दुने दक्वं अमेरिकी सेना अमेरिकाय् लिहां वइगु घोषणा यायेधुंकूगु दु ।

अमेरिकाया सेनां अफगानिस्तान त्वःतेगु शुरु जुइधुंकाः तालिवानीतय्सं अफगानिस्तानी सेनायात आक्रमण यायेगु अप्वयावःगु दु ।