आः असनय् गाडी निषेध मखु वान–वे

येँ- न्हि न्ह्यवंनिसें ज्याथा, भोताहिति, कम–लाछि, असं, जःखः गाडी निषेध याना तःगु खःसा आः उकियात चीकाः वान–वे याइगु जूगु दु । पूर्ण रुपं गाडी निषेध यायेबलय् स्थानीय जनजीवन व स्थानीय व्यवसायय् लिच्वः लाःगु महसुस जूगुलिं उकियात परिमार्जन यानाः थ्व न्हूगु व्यवस्था यायेत्यंगु खः ।

थ्व निर्णय कथं आः वडा अध्यक्ष, ट्राफिक पुलिस व स्थानीय क्लबया पदाधिकारीपिं च्वनाः थाय्थासय् तया तःगु प्रबेश निषेधया बोर्ड लिकयाः आः वान–वेया बोर्ड तइगु जूगु दु ।

ज्याथा युवा क्लबया ग्वसालय् म्हिगः जूगु छगू सहलहपाखें थ्व निर्णय याःगु खः । सहलह ज्याझ्वलय् २५ वडा अध्यक्ष निलकाजी शाक्य, २७ वडा अध्यक्ष चिनियामान बज्राचार्य, असन सेवा समिति, न्हायकं त्वाः समिति, ह्याउँनिभाः पुचः, त्यःर, कुसुमबियालाछि समिति लगायत थीथी स्थानीय क्लब, स्थानीय बासिन्दा, ब्यापारी व ट्राफिक पुलिसया प्रतिनिधिपिं दुथ्याःगु खः ।

स्थानीय जनताया भावनायात कदर यासें सवारी निषेध चीकेगु ज्या जूगुलिं सम्बन्धित वडा अध्यक्षपिं व ट्राफिक प्रहरीयात स्थानीय जनतां सुभाय् देछाःगु दु । असं लागाय् सवारी साधन निषेध याःगुलिं स्थानीय नेवाःतय् परम्परागत बजाः हे विस्थापित जुइगु तकया अवस्था वयेफुगु खँय् चिउताः प्वंकेगु ज्या जुयाच्वंगु खः ।