
यल(नेपालभाषा टाइम्स)- खपिन्छेँ टोल सुधार कमिटीया ३३ क्वःगु साधारणसभा वंगु शनिवाः खपिन्छेँ मंकाः चपाःछेँय् जुल । किपा ब्वज्या लिपा औपचारिक रुपं उलेज्या याःगु दँमुँज्याय् थीथी ख्यलय् सफलता प्राप्त यानादीपिं त्वाःया जःपिंत हनेज्या नं याःगु खः ।
खपिन्छेँ त्वाःया नायः राजमान अवालेया सभापतित्वय् न्ह्याःगु न्हापांगु सत्रया ज्याझ्वलय् ज्यापु समाज यलया नायः तीर्थलाल महर्जन मूपाहांकथं झायादीगु खः । ज्याझ्वलय् नकतिनि नीस्वंगु त्वाःया गुरुमण्डलय् दुथ्याःपिं मू गुरु अष्टलाल महर्जन, दाफा म्येँ गुरु मोतिलाल महर्जन, धिमय् गुरु किरण महर्जन, तपगु बासुरि गुरु हरि महर्जन, चिपुगु बासुरि गुरु सानुलाल अवाले, धोलक गुरु प्रशिष महर्जनयात बेतालि चिकाः व सहायक गुरुपिं किसलाल महर्जन, मनोज महर्जन, भुवन महर्जन, रोशन महर्जनयात खादा क्वखायेका हनेज्या याःगु खः ।
अथे हे २०७८ सालया एसइइ परीक्षाय् उत्कृष्ट ल्याः हयादीपिं त्वाःया रोजल महर्जन, कृतिका महर्जन, प्रेक्षा महर्जन, सुबिन अवाले, सोमिग अवाले, सोनिल महर्जनयात नं हनेज्या याःगु खः ।
थुकथंया ज्यापु समाज यलया सल्लाहकारय् नियुक्त जुयादीम्ह केशव महर्जन, चाइनिज भाषा अनुवादक आपुलाल अवाले, नेशनल जर्नालिज्म अवार्ड कल्चर एण्ड टुरिज्म – २०७९अवार्डपाखें सम्मानित हरि महर्जन, निक्वःगु नेपालभाषा स्टार म्युजिक भिडियो अवार्डय् बेष्ट मोडल जुयादीत ताःलाःम्ह नांजाःम्ह कलाकार सुरज व्यञ्जनकारयात नं मतिनाया चिं लःल्हासे हनेज्या याःगु खः ।
निगूगु सत्रय् न्ह्याःगु बन्द सत्रय् कमिटीया छ्याञ्जे सुरज व्यञ्जनकारं वार्षिक प्रगति प्रतिवेदन व दांभरिं राजकुमार महर्जनं आर्थिक प्रतिवेदन न्ह्यब्वयादीगु खः ।
ज्याझ्वलय् विशेष पाहांकथं त्वाः थकालि आशालाल महर्जन, मू गुरु अष्टलाल महर्जन, म्येँ गुरु समन्वय कमिटीया कजि मोतिलाल महर्जन, समाजया न्हापांम्ह न्वकु सबिना महर्जन सल्लाहकार केशव महर्जनपिं झायादीगु खः ।
LEAVE YOUR COMMENTS