धल्कोय् तरकार काण्ड ः छम्ह सित, न्याम्ह घाःपाः
येँ (नेपालभाषा टाइम्स)÷येँ मनपा १७ वडास्थित धल्को त्वालय् वंगु बुधवाः तरवारं पालाः जूगु ल्वापुइ लानाः छम्ह स्थानीय सीगु दुसा मेपिं न्याम्ह घाःपाः जूगु दु । बुधवाः न्हिनय् जूगु उगु घटनाय् लानाः स्थानीय अनित पुजारी सीगु खः । घटना छगू सामान्य खँयात कयाः जूगु खःसां निगू परिवारया दथुइ पुलांगु ल्वापु दुगु जुयाः मनूया ज्यान हे वनीगु कथं तच्वया वंगु खँ धाःगु दु ।
घटना जुइ छन्हु न्ह्यः लुति अजिमाया देगः जःखः ल्वहँतं सियाः ढलान याःगु खःसा उगु ढलान यानातःगु थासय् देगः जःखः च्वनीपिं खातेतय्सं न्हुत्तुन्हुयाच्वन धकाः स्थानीय किरण पुजारीं पंवंगु जुयाच्वन । तर खातेतय्सं किरणयात हे दायाः छुरां समेत सुया बिल । उकी किरण घाःपाः ला मजू । वयां तुरुन्त लिपा हे अन प्रहरी वयाः खातेतय्त ज्वना यंकल । थ्वहे खँय् शुरु जूगु ल्वापु लिपा तःधं जुया वंगु खँ स्थानीय मनूतय्सं धाःगु दु ।
थ्व घटनाया कन्हय् कुन्हु सुथय् ज्याय् वनाच्वंम्ह किरणया किजायात जःलाखःला दिनेश पुजारी व वयागु पुचलं लिना यंकल । वयां लिपा किरणया छेँजःपिं ल्वाभः सहित पिहां वयाः दिनेशया छेँजःपिंत आक्रमण याः वल । उगु इलय् दिनेशं कःसिइ च्वनाः अप्पां कयेका हःगु व किरणया छेँजःपिंसं तरवार प्रहार याःगु खँ धाःगु दु । उकी हे लानाः अनित पुजारी घाःपाः जूगु खः । लिपा वयात अस्पताल यंकूगु इलय् मंत धकाः घोषणा याःगु खः । ल्वापुइ उमिसं खुँडा, तरवार, कथि थेंज्याःगु ल्वाभः छ्यःगु खः । स्थानीय मनूतय्सं धाःकथं थ्व निगू छेँजःपिनि दथुइ पुलांगु हे ल्वापु दुगु खः । उकिं नं चीधंगु त्वहः दयेवं ल्वापु भड्के जुया वंगु खः ।
उगु ल्वापुइ लानाः सुबिन्द्र पोडे, किरण पुजारी, माया पुजारी, विक्रम पुजारी दिनेश पुजारी व अमृत पुजारी घाःपाः जूगु खः । घाःपाः जूपिं मध्ये छम्हेसित आः मेडिसिटी अस्पतालय् भेन्टिलेटरय् तयाः वासः याकातःगु दु ।
घाःपाः जूपिं प्यम्ह मध्ये निम्हेसित महाराजगञ्जया शिक्षण अस्पतालय् व निम्हेसित राष्ट्रिय ट्रमा सेन्टरय् वासः याकातःगु जानकारी महानगरीय प्रहरी वृत्त सोह्रखुट्टें बिउगु दु । घटनाय् दुथ्याःपिं न्हय्म्हेसित प्रहरीं ज्वनातःगु दु । प्रहरीं सुजल देउला, अमृत पुजारी, सागर देउला, रविन्द्र पोडे, टिकामाया पुजारी व सञ्जाली पुजारीयात ज्वनातःगु दु ।
ल्वापु लिपा धल्को लागाय् प्रहरीं सुरक्षा प्रवन्ध बढे याःगु दु । लिसें थ्व ल्वापु जुयाच्वंथाय् खिचे यानातःगु छगू भिडियो नं सामाजिक सञ्जालय् भाइरल जुयाच्वंगु दु । उकी छम्ह मनुखं मेम्ह छम्हेसित म्येय् क्वःदली थें क्वःदयेक तरवारं पाःगु खनेदु ।
LEAVE YOUR COMMENTS