धरहराया लिक्क छेँ दनेगु हानं रोक्का

येँ – धराहराया दक्षिणपाखे गुथि संस्थानं टेन्डर आह्वान यानाः दयेकेत्यंगु छेँ येँ महानगरपालिकां हाकनं पना बिउगु दु ।टेन्डर लाकूगु संस्थां मनपां निर्माण यायेगु ज्या दिकेधुंकाः जिल्ला अदालतय् मुद्दा तःगु खःसा उगु मुद्दां त्यायेवं हाकनं छेँ दनेगु ज्या न्ह्याकूगु खः । तर मनपां उकियात हाकनं पना बिउगु दु ।

येँ मनपाया उपमेयर हरिप्रभा खड्गी श्रेष्ठं खुल्ला थासय् व्यापारिक भवन दयेके मजिउ धकाः उगु ज्या पना बियागु खँ ‘नेपालभाषा टाइम्स’ यात कनादीगु दु । मनपाय् नक्सा पास याना तयेधुंकूगु थाय् खःसां नं अन गुगुं नं कथंया भवन दयेकेगु ज्या उचित मजू धासें वय्कलं अन दयेकेत धकाः डिजाइन यानातःगु छेँ व्यापारिक प्रयोजनया निंतिं मखुसें होेटल तयेगु कथं डिजाइन यानातःगुलिं अज्याःगु छेँ दंके बीगु उचित मजुइगु खँ नं कनादीगु दु ।

मेखे गुथि संस्थानया प्रवक्ता सरोज थपलियां धाःसा उगु छेँ दनेत गुगुं नं कथंया समस्या मजूगु धासें न्हापा पसः तयाच्वंपिंसं थःपिनिगु व्यवसायय् समस्या वइ धकाः थीथी थासय् निवेदन तयाः छेँ दनेत अलमल यानाच्वंगु खँ कनादीगु दु । स्थानीय वासिन्दाया नामं जिल्ला अदालतय् मुद्दा तयेगु ज्या याःगु खःसां नं अदालतं संस्थानया पक्षय् निर्णय यायेधुंकाः सम्पदा संरक्षणया नामं प्रधानमन्त्री कार्यालयनिसें गुथि संस्थान, पुरातत्व विभाग, येँ महानगरपालिका व पुनर्निर्माण प्राधिकरण आदि थासय् निवेदन बिउगु खँ नं वय्कलं कनादीगु दु ।

वयां लिपा प्रधानमन्त्री कार्यालयं अन समस्या छु खः उकिया बारे स्पष्ट यायेत निर्देशन वःगु खँ नं वय्कलं कनादीगु दु । वयां लिपा संस्थानं प्रधानमन्त्री कार्यालय लिसः बियागु खँ कनादिसें वयां लिपा मनपा, पुरातत्व विभाग, संस्थान व पुनर्निर्माण प्राधिकरण दथुइ सहलह यानाः आःयात छुं ई छेँ दनेगु ज्या दिकूगु जानकारी नं वय्कलं बियादिल ।

उगु सहलहया झ्वलय् अन छेँ दने मबीगु बरु टेन्डर लाकूगु ठेकेदारयात क्षतिपूर्ति बीगु खँ वःगु जानकारी बियादिसें थःपिंसं उकियात अस्वीकार यानागु खँ वय्कलं कनादिल । वय्कलं धयादी, ‘ध्यबा हे वःगु मदुनि क्षतिपूर्ति गथे यानाः बीगु ? न्हापां ध्यबा निं वयेकि वयां लिपा मेगु खँ जुइ ।’ गुथिं संस्थानं थीथी जात्रा पर्व चले यायेत सरकारं ध्यबा बीगु ज्या बन्द याःगुलिं यानाः थःपिनिगु नामय् दुगु जग्गा बालं बियाः जात्रा चले यायेमाःगु अवस्था वःगु धकाः दावी यानाच्वंगु खँ नं वय्कलं कनादीगु दु ।