ओसाका उडान निगमया प्रतिष्ठा
येँ – नेपाल वायुसेवा निगमं जापानया ओसाका तकया उडान क्वःछिनातःगु इलय् हे जुइगु खँ धाःगु दु । निगमं अन्तर्राष्ट्रिय गन्तव्य विस्तार यायेगु झ्वलय् वइगु लछि दुने हे जापानया ओसाकाय् उडान याइगु खँ धाःगु दु । ओसाका धुंकाः जापानया हे नारिता अन्तर्राष्ट्रिय विमानस्थलय् नं उडान यायेगु खँ धाःगु दु ।
निगमं जापान धुंकाः चीनया थीथी थासय् व मोहनि न्ह्यव हे सउदी अरेबियाया रियादय् उडान यायेगु योजना दयेकातःगु दु । अथेहे दक्षिण कोरियाया सिओलय् नं उडान यायेगु निंतिं प्रक्रिया न्ह्याःगु खँ धाःगु दु । निगमं क्वःछिनातःगु इलय् हे ओसाकाय् उडान यायेगु व मेमेगु गन्तव्यय् नं उडान यायेगु धया वयाच्वंगु ताः ई दयेधुंकूसां आःतक उडान धाःसा यायेमफयाच्वंगु दु ।
जापानय् निगमया विमान ब्वयेकेगु धाःसा अन नियुक्त याःम्ह एजेन्टया हे विवाद जुयाः सर्वोच्च अदालत थ्यंक मुद्दा थ्यंगु दु । अथेहे सियोलय् विमान ब्वयेकेगु कुतः याःसां युरापेली संघं नेपाःया विमानतय्त तयातःगु प्रतिबन्धया कारणं दक्षिण कोरियां नेपाःया विमान दुकायेत अस्वीकार यानाच्वंगु दु ।
निगमं निगः वाइड बडी न्यायेधुंकाः ताःहाकःगु रुटय् विमान ब्वयेके मफयाः तःधंगु घाटा फये मालाच्वंगु दु । उकिं नं निगम ताःहाकःगु रुटय् विमान ब्वयेकेत हथाय् चायाच्वंगु दु । तर निगमया थ्व कुतलय् धाःसा थीथी समस्या वया हे च्वंगु दु । अथेखःसां निगम हारे मचाःगु खँ धाःगु दु ।
‘ओसाका उडान निर्धारित तालिका कथं हे जुइ । थ्व निगमया प्रतिष्ठालिसे स्वानाच्वंगु विषय खः । बजारय् न्ह्यागु हे हल्ला जूसां निगमं व्यापार यायेमाःगु बाध्यता दु ।’
निगमया प्रवक्ता गणेशबहादुर चन्दं जापानया ओसाका तक विमान ब्वयेकेगु निगमया प्रतिष्ठाया हे खँ जुइधुंकूगु धासें न्ह्याथे यानाः नं क्वःछिनातःगु इलय् हे निगमया विमान ओसाका वनीगु खँ धयादीगु खः । राससलिसे खँ ल्हासें वय्कलं धयादीगु दु, ‘ओसाका उडान निर्धारित तालिका कथं हे जुइ ।
थ्व निगमया प्रतिष्ठालिसे स्वानाच्वंगु विषय खः । बजारय् न्ह्यागु हे हल्ला जूसां निगमं व्यापार यायेमाःगु बाध्यता दु ।’निगमं वइगु भदौ १२ गते निसें ओसाका उडान यायेगु तालिका दयेकोतःगु दु । निगमं त्रिभुवन विमानस्थलं ओसाकाया कान्साइ अन्तर्राष्ट्रिय विमान स्थलय् वाःय् स्वंगू उडान यायेगु तालिका दयेकातःगु खः ।
निगमया विमान सोमवाः, बुधवाः व शुक्रवाः ओसाकाया निंतिं उडान याइ । प्रवक्ता चन्दं जापानया हे मेगु गन्तव्य नारिता अन्तर्राष्ट्रिय विमानस्थलय् उडान यायेगु प्रक्रिया नं न्ह्यानाच्वंगुख ँ धयादीगु दु । सन् २०२० य् जुइगु नेपाः भ्रमण वर्षयात लक्षित यानाः नं निगमं जापानय् उडान यायेगु लक्ष्य तयातःगु दु ।
नेपाल पर्यटन बोर्डया कथं सन् २०१८ य् २९ हजार ८१७ म्ह जापानीत नेपाः चाःहिउ वःगु दु । अथेहे सन् २०१७ य् २७ हजनार ३२६ म्ह जापानी पर्यटक नेपाः दुहां वःगु दु । तप्यंक जापानय् उडान यायेफत धाःसा अझ अप्वः पर्यटक दुकायेफइगु अनुमान दु ।
मेखे निगमं चीनया ग्वान्झाउ तक नं उडान यायेगु कुतः यानाच्वंगु दुसां चिनिया पक्षं धाःसा आलटाल यानाच्वंगु खँ धाःगु दु । चीनया नागरिक उड्डयन ज्याकुथिं ‘सेफ्टी अडिट’ यायेगु निंतिं ई फ्वंगुलिं छुं ई ढिला जूगु खँ निगमं धाःगु दु । निगमं चीनय् मोहनि न्ह्यः हे नेपाःया ध्वजावाहक विमान यंकेगु लक्ष्य तयातःगु दु ।
LEAVE YOUR COMMENTS