
येँ – ट्याक्सीया भाः १० प्रतिशत अप्वयेकीगु जूगु दु । नेपाल गुणस्तर तथा नापतौल विभागं थुकिया निंतिं ट्याक्सीया मिटर भाः समायोजन यायेगु ज्या न्ह्याकाच्वंगु दु । न्हूगु भाः कथं आः छगू किलोमिटर गुडे जुल धायेवं ट्याक्सीया मिटरय् ५३ तका क्यनीगु जूगु दु । थ्वयां न्ह्यव ५० तक जक भाः जुयाच्वंगु खः ।
वंगु असोज ७ गते निसें सार्वजनिक बसया भारा थकायेवं ट्याक्सीया भारा नं थकायेमाःगु माग जुयाच्वंगु खः । ट्याक्सीया भारा अप्वयेकेगु निंतिं विभागं वंगु मंसिर निसें मिटरय् भाः समायोजन यायेगु ज्या न्ह्याकाच्वंगु खः । विभागया महानिर्देशक विश्वबाबु पुडासैनिं आःतक २ हजार २०० गः ट्याक्सीया मिटरय् समायोजन ज्या जुइधुंकूगु खँ राससयात धयादीगु दु ।
नेपाल मिटर ट्याक्सी व्यवसायी संघया अध्यक्ष अर्जुन गौतमं ट्याक्सीया भारा समायोजन यायेवं ट्याक्सी व्यवसायीतय्त छुं भचा राहत जुइगु खँ धयादीगु दु । वय्कलं आः समायोजित भाः नं वैज्ञानिक कथं मजूगु खँ धयादीगु दु । थौंकन्हय् स्वनिगलय् जक १० हजार ६०० गः मिटर ट्याक्सी संचालन जुयाच्वंगु दु ।
LEAVE YOUR COMMENTS