वैदेशिक रोजगारीइ स्थानीय तहपाखें हे समस्या ज्यंकेबीत सुझाव
येँ – वैदेशिक रोजगारी सम्बन्धी सरकारं गठन याःगु छगू कार्यदलं वैदेशिक रोजगारी सम्बन्धि समस्यायात स्थानीय तहपाखें हे सम्बोधन यायेगु व्यवस्था यायेत सुझाव बिउगु दु । वैदेशिक रोजगारय् सुधार हयेगु निंतिं सुझाव बीत श्रम तथा रोजगार मन्त्रालयं स्वंगू कार्यदल गठन यानातःगु खः । थ्व स्वंगू कार्यदल मध्ये आइतवाः छगू कार्यदलं लःल्हाःगु प्रतिवेदनय् थ्व सुझाव बियातःगु खः ।
समग्र वैदेशिक रोजागरी क्षेत्रया सुधार यायेगु निंतिं सुझाव मुंकेत गठन याःगु स्वंगू कार्यदल मध्ये दकलय् अप्वः कार्यक्षेत्र तोके यानातःगु वैदेशिक रोजगार सुझाव सुधार कार्यदलं स्थानीय तहयात दुथ्याकेत सुझाव बिउगु खः । आः वैदेशिक रोजगारीया न्हूगु गन्तव्य मालेगु व आधिकारिक माध्यमपाखें रेमिट्यान्स दुतहयाः लगानी सदुपयोग यायेगु विषयय् लिसे सम्बन्धित कार्यदलं प्रतिवेदन लःल्हात धायेवं समग्र नीति दयेकेगु खँ मन्त्रालयं धाःगु दु ।
आइतवाः लःल्हाःगु प्रतिवेदनय् भविष्यया रोजगार नीति, ऐनय् हयेमाःगु हिउपाः, रोजगार व्यवसायीतय्थाय् यायेमाःगु सुधार, ज्यामितय्के कयाच्वंगु शुल्क, ज्यामितय् करारय् सरकार पक्षया संलग्नता थेंज्याःगु विषयय् सुझाव दुथ्याकातःगु खँ धाःगु दु ।कार्यदलया संयोजक व पुंलाम्ह सचिव पूर्णचन्द्र भट्टराईनं थःपिंसं बियागु सुझाव मध्ये स्थानीय तहपाखें यायेमाःगु ज्याया सुझाव महत्वपूर्ण जूगु खँ धयादीगु दु ।
‘ठगे याःपिनि बारे उजुरी यायेगु थाय् येँय् जक दुगु खः । आः वैदेशिक रोजगार संरचना प्रदेश तहतक थ्यंकेमाःगु व व्यक्तिगत ठगी प्रमुख जिल्ला अधिकारीं स्वयेदइ कथं जनताया लिक्क थ्यंकेमाः’ वय्कलं धयादीगु दु । मन्त्रालयया अधिकारीतय्सं आः वःगु सुझावयात अध्ययन यानाः कार्यान्वयनय् यंकेगु खँ मन्त्रालयया अधिकारीतय्सं धाःगु दु ।
मन्त्रालयया सचिव महेश दाहालं ल्यं दनिगु निगू कार्यदलया प्रतिवेदन वयेवं समग्र सुधारया योजना दयेकेगु खँ धयादीगु दु । सरकारं मेगु निगू कार्यदल मध्ये छगूयात खाडी देय् बाहेक मेगु बांलाःगु गन्तव्य मालेत व मेगु कार्यदलयात वैदेशिक रोजगारय् वनाच्वंपिं ज्यामितय्सं छ्वयाहइगु ध्यबा वैधानिक लँपु जुयाः गुकथं दुत हयेगु व उकिया सदुपयोगु यायेगु सम्भावना बारे सुझाव बीत जिम्मा बियातःगु दु ।
नेपालय् दुहां वइगु रेमिट्यान्स अप्वः थें अवैध लं दुहां वयाच्वंगुलिं ध्यबाया बांलाक सदुपयोग जुइमफयाच्वंगु खँ विज्ञतय्सं धयाच्वंगु दु । अथेहे वैदेशिक रोजगारीया न्हूगु गन्तव्य माले मफुगुलिं नं नेपाः खाडी मुलुकय् सीमित जुयाच्वंगु खँ नं धयाच्वंगु दु ।
LEAVE YOUR COMMENTS