कन्या मन्दिरपाखें सत्यमोहनयात हना
येँ – नेपाःया दकलय् न्हापांगु मिसा ब्वनेकुथि कन्या मन्दिर मा.वि.या ७२ क्वःगु बुदिंया लसताय् जूगु छगू विशेष ज्याझ्वलय् वाङ्मय शताब्दीपुरुष डा. सत्यमोहन जोशीयात दोसल्ला न्ययेकाः हनापौ देछासे हनेज्या यात ।
विद्यालय व्यवस्थापन समितिया अध्यक्ष कमलनाथ मिश्रया सभापतित्वय् जूगु ज्याझ्वलय् मूपाहां सत्यमोहन, विशेष पाहांकथं प्रदेश नं ३ या सांसद वसन्त मानन्धर, शिक्षा विभाग तथा समन्वय इकाइ येँया प्रमुख नन्दलाल पौडेल, यूएसएडएनआरएस परियोजनाया उपप्रमुख अर्जुन कोइराला, येँमपा १७ वडाया अध्यक्ष नविन मानन्धरपिं झायादीगु खः ।
सहायक प्रधानअध्यापक बद्रिनाथ भट्टराईं लसकुस यानादीगु ज्याझ्वलय् पुलांम्ह शिक्षका सनी पाण्डे, स्कुलया उत्कृष्ट शिक्षिकापिं, कन्यामन्दिर अल्मनि एशोसिसनयात नं हनापौ व दोसल्ला न्ययेकाः हनेगु ज्या जूगु खःसा एसइइ परीक्षाय् ताःलाःपिं, विद्यालयया नर्सरीनिसें १२ गू तगिं तकया उत्कृष्ट विद्यार्थीपिंत सिरपाः नं लःल्हायेगु ज्या जूगु खः ।
ज्याझ्वलय् थीथी दातापिंसं पलिस्था यानातःगु छात्रवृत्ति नं लःल्हाःगु खः । थ्व झ्वलय् पुलांम्ह शिक्षिका हितलक्ष्मी कंसाकारं थुगु दँ निसें स्कुलय् कक्षा ९ व १० य्् ऐच्छिक विषय नेपालभाषा कयाः ब्वंपिं विद्यार्थीपिंत १०००÷– तका लःल्हानादीगु खःसा स्कुलया पुलांम्ह विद्यार्थी विमला मानन्धरं ‘पूर्ण–मिठा पलेस्वां’ छात्रवृत्तिपाखें २०६९ दँ निसें निरन्तर रुपं नेपालभाषा विषय कयाः अध्ययन याना वयाच्वंपिं विद्यार्थीपिंत म्हतिं ५००÷– तका दां लःल्हानादिल । ज्याझ्वलय् स्कुलया ‘स्मारिका’या नं चिखि फ्यनेज्या जूगु खः ।
LEAVE YOUR COMMENTS