प्रदेश सरकारं नेपालभाषाया पत्रकारिता प्रवर्धन यायेत प्रोत्साहित याइगु

येँ – बागमति प्रदेशं पत्रकार कल्याण कोषया दायरा तःचा यानाः नेपालभाषाया पत्रकारिता प्रवर्धन यायेत प्रोत्साहित याइगु जूगु दु । बागमति प्रदेश सरकारं बुधवाः न्ह्यब्वःगु नीति तथा कार्यक्रमय् प्रदेश दुने नेपालभाषाया पत्रकारिता प्रवर्धन याइपिंत प्रोत्साहन यायेगु खँ न्ह्यनातःगु दु ।

‘पत्रकार कल्याण कोषया दायरा तःचा यानाः यंकेगु जुइ ।,’ नीति तथा कार्यक्रमय् न्ह्यथनातःगु दु, ‘प्रदेशया प्रचलनय् दुगु फुक्कं भाषाभाषीया प्रवर्धन यानाः न्हापांगु चरणय् तामाङ व नेपालभाषाया पत्रकारिता प्रवर्धन यायेत चाहेजूपिं संचार माध्यमयात प्रोत्साहित यायेगु नीति अवलम्बन यायेगु जुइ ।’

नीति तथा कार्यक्रम पारित जुइधुंकाः नेपालभाषा टाइम्सनाप खँल्हाबंला यासें प्रदेशया सञ्चार रेजिष्टार रेवती साप्कोटां प्रेदशय् दुने च्वंगु फुक्क भाय्यात संचार क्षेत्रय् प्रोत्सहान यायेगु कथं थुगु नीति वःगु धयादिल ।

‘आः थ्वहे नीति कथं कार्याविधि दयेकेगु ज्या जुइ ।,’ वय्कलं धयादिल, ‘थ्वहे दँय् थुकीया निंतिं बजेटया व्यवस्था नं जुइ ।’

अथेहे नीति तथा कार्यक्रमय् संचार माध्यमय् कार्यरत मिसा पत्रकारतय् क्षमता अभिवृद्धि यायेगु ज्याझ्वःत संचालन यायेगु खँ न्ह्यथनातःगु दु । मर्जरय् वनेत चाहेजूगु संचार माध्यमयात प्रोत्साहन यायेगु नीति नं प्रदेश सरकारं काःगु दु ।