लुम्बिनी मखु ‘मगरात’लुम्बिनी’ नां तयेत माग

येँ (नेपालभाषा टाइम्स) – प्रदेश नम्बर ५ या नां ‘लुम्बिनी’ तःगु विरोध यासें मगर समुदायया मंकाः संगठन नेपाल मगर संघ व जनता समाजवादी पार्टीलिसे सतीगु मगरात संयुक्त संघर्ष समितिं थुगु प्रदेशया नां ‘मगरात-लुम्बिनी’ तयेत माग याःगु दु ।

नेपाल मगर संघ व मगरात संयुक्त संघर्ष समितिं छगू विज्ञप्ति पिकासें ‘लुम्बनी प्रदेश’ नां तयेगु थ्व ज्यायात ‘महेन्द्रकालीन’ ज्याखँ धकाः टिप्पणी याःगु दु। मगर संघया अध्यक्ष नविन रोका मगर व मगरात संयुक्त संघर्ष समितिया संयोजक बोम दर्लामी मगरं मंकाः कथं जारी याःगु विज्ञप्तिइ प्रदेशया नां ‘लुम्बिनी’ तयेगु मगरातवासी जनताया चाहना लिसें नेपाःया संविधान व संघीयताया मर्म अःखः जूगु खँ धाःगु दु ।

विज्ञप्तिइ छुं धार्मिक पहिचानया आधारय् जक लिकुनाः ‘लुम्बिनी’ नामाकरण याःगु धासें ऐतिहासिक मानव पहिचान व सभ्यताया आधारय्प्र देशया नां ‘मगरात-लुम्बिनी’ तयेमाःगु माग यानातःगु दु। थःपिनिगु मागयात वेवास्ता यात धाःसा साबिकया प्रदेश नं. ४, ५ व ६ या ऐतिहासिक मगरात भूभागयात कःघानाः एकीकृत मगरात स्वायत्त प्रदेश दयेकेगु निंतिं सशक्त आन्दोलन यायेत थःपिं बाध्य जुइगु ख्याच्वः नं विज्ञप्तिइ बियातःगु दु। वंगु असोज २० गते च्वंगु ५ नम्बर प्रदेशसभा बैठकं प्रदेशया नां ‘लुम्बिनी’ तयेगु व स्थायी राजधानी दाबया भालुवाबय् तयेगु प्रस्ताव पारित याःगु खः ।

थौं कन्हय् बुटवलय् तयातःगु राजधानी भालुवाङय् यंकेगु निर्णयया विरुद्ध कांग्रेसया सांसदतय्सं संसदय् तोडफोड समेत जूगु खः ।