म्ह्याय्पिनिगु पाः
कलिउड धयातःगु खस भाय्या फिल्मख्यः आः न्हू पुस्ताया ल्हाती लाःवःगु दु । न्हू पुस्ताय् नं आः वयाः कलिउडया फिल्मकःमिया मस्तय्सं नं थ्व ख्यलय् थःगु पलाः न्ह्याकूगु जक मखसे क्वातुकेत तकं ताःलाके धुंकूगु दु । विशेष यानाः पुलां पुस्ताया हिरो भुवन के.सी.या काय अनमोल के.सी.यात थुकिया ज्वःमदुगु दसुया रुपय् कायेमाः ।
आः वयाः हिरोया काय्पिं जक मखसे हिरो व हिरोनीया म्ह्याय्पिंसं नं फिल्म ख्यलय् थःगु पलाः न्ह्याकाहःगु दु । सुहाना थापायात थुकिया बांलाःगु दसु कथं कायेमाः । पुलांम्ह हिरोनी झरना थापाया याकःम्ह्याय् सुहाना थापां थुगुसी थः हे मामं निर्देशन याःगु “ए मेरो हजुर ३” पाखें कलिउडय् इन्ट्रि यात ।
थ्व फिल्मया निर्माता नं सुहानाया अबु सुनिल कुमार थापा हे खः । थुकथं कलिउडय् छम्ह म्ह्याय्या पलाः न्ह्यात । कलिउडय् थुकथं पुलांगु पुस्ताया सेलिब्रिटीया म्ह्याय्पिंसं पलाः न्ह्याकूगु थ्व न्हापांखुसी धाःसा मखु । न्हापा नं आपाःसिनं पलाः न्ह्याकेधुंकल ।
छगू जमानाया नांजाःम्ह कलाकार सुशीला रायमाझीया म्ह्याय् प्रसिद्धिका रायमाझी नं थःहे मामं दयेकूगु “पिंजडा” व “धनसम्पत्ति” नांयागु फिल्मय् हिरोनी जुयाः म्हितूगु खःसा नांजाःम्ह फिल्मकःमि शम्भु प्रधानया म्ह्याय् ईश्वरी प्रधानं “सो¥हवर्षे जोवन” फिल्मय् हिरोनी जुयाः म्हितूगु खः ।
थथे हिरोनी जुयाः म्हितेसिबें न्ह्यः छम्ह बालकलाकारया रुपय् “बेहुली” व “स्वर्ग” थेंज्याःगु छुं छुं फिल्मय् म्हितेधुंकूम्ह खः । ईश्वरीया मां नूतन प्रधान नं कलिउडय् छम्ह फिल्म च्वमिया रुपय् नांजाःम्ह सेलिब्रिटी खःसा नूतन प्रधान व शम्भु प्रधानं “सक्कली नक्कली” नांयागु फिल्मय् निम्हतिपू हे जुयाः म्हितूगु खः ।
पुलांपिनिगु हे खँ ल्हायेबलय् उगु इलय् चंखे धकाः नांजाःम्ह कमेडी स्टार गोपालराज मैनालीया म्ह्याय् सज्जा मैनाली बालकलाकारया रुपय् पलाः न्ह्याकाः लिपा वनाः हिरोनी जूम्ह खः । पुलांपिं हे मध्ये नांजाःम्ह फाइट डाइरेक्टर राजेन्द्र खडगीया म्ह्याय् रागीनी खड्गीं हिरोनी जुयाः छगू निगू फिल्म म्हितूगु खःसा लिपा वनाः वं फिल्मख्यः त्वःतावंगु खः ।
आः वयाः हिरोया काय्पिं जक मखसे हिरो व हिरोनीया म्ह्याय्पिंसं नं फिल्म ख्यलय् थःगु पलाः न्ह्याकाहःगु दु । सुहाना थापायात थुकिया बांलाःगु दसु कथं कायेमाः
न्हापा नेपाःया फिल्मख्यःया सेलिब्रिटीया म्ह्याय् फिल्मय् वयेगु उलि मयाःसां आः वयाः थुकिया ल्याः अप्वःयावःगु दु । थौंकन्हय् चर्चा जुयाच्वंकथं छगू ईया लोकंह्वाःम्ह हिरो दिलिप रायमाझीया म्ह्याय् दिव्या रायमाझी नं हिरोइन जुया वयेत्यंगु धइगु खँ दु । वं कलाकार किरण के.सी.या न्हूगु फिल्म “लक्का जवान” य् हिरोनीया रुपय् डेब्यु याइगु हुइनाभुइना दु ।
थ्व फिल्मयात नांजाःम्ह हास्य कलाकार शिवहरि पौड्यालं निर्देशन याइगु जूगु दु । दिव्या रायमाझीया अबु दिलिप रायमाझी आःतक नं हिरो हे जुयाः नं म्हिता वयाच्वंगु दनिसा थगुने तिनि वं “कहींकतै” नांयागु फिल्मय् हिरो जुयाः म्हितूगु खः । थ्व “कहींकतै” फिल्मं डेब्यु याःम्ह शिवानी गिरी नं छम्ह हिरोनी उमा बेबीया म्ह्याय् खः ।
उमा बेबी थः हे नं आःतक हिरोनी हे जुयाः फिल्म म्हितेगु मत्वःतूनिम्ह सेलिब्रिटी खः । अथे हे आःतक नं हिरो हे जुयाः म्हिता वयाच्वंम्ह जयकिशन बस्नेतया म्ह्याय् जान्ह्वी बस्नेतं नं हिरोनीया रुपय् थःगु पलाः न्ह्याकाहःगु दुसा वं पञ्चायत, सुब्बा साब, जय पर्शुराम थेंज्याःगु फिल्म म्हितेधुंकूगु दु ।
निलाप्यला न्ह्यःतिनि वयागु “यात्रा ः द म्युजिकल भ्लग” नांयागु फिल्म पिदंगु खः । जयकिशन बस्नेतया दाजु फिल्मकःमि शोभित बस्नेतया काय सलोन बस्नेत थौंकन्हय् लोकंह्वानाच्वंम्ह हिरो खःसा शोभितया म्ह्याय् सलिना बस्नेत नं थः दाजु सलोन थें हे तुं बालकलाकारया रुपय् फिल्मय् दुहां वःम्ह खः ।
थःहे अबु शोभित बस्नेतया “टिचर” नांयागु छगु फिल्मय् हिरोनी जुयाः म्हितूम्ह सलिनां थ्व फिल्म पिदने मफुबलय् आःयात उच्चशिक्षा निं पूवंकेगु मति तयाः आखलय् ध्यान तयाच्वंगु दु । थथे आःतक नं फिल्मय् मेन रोल वःसा म्हितेगु यानाच्वंम्ह करिश्मा मानन्धरयात आपाःसिनं एभरग्रीन हिरोनी धकाः धायेगु यानातःगु दु ।
आः वया म्ह्याय् कविता मानन्धर नं फिल्मय् हिरोनी जुयाः वइगु जूगु दु । करिश्माया म्ह्याचं डेब्यु यायेत्यंगु फिल्मया नां “एउटा यस्तो प्रेमकहानी” खः ।
नांजाःम्ह हिरो शिव श्रेष्ठं दयेकाच्वंगु थ्व फिल्मय् शिव श्रेष्ठया काय शक्ति श्रेष्ठया अपोजिट कविता मानन्धर हिरोनी जुयाः कलिउडया पर्दाय् पिलू वयेत्यंगु दु ।
पुलांपिं सेलिब्रिटीया म्ह्याय्पिं मध्ये “सिन्दुर” फिल्मया हिरो विश्व बस्नेतया म्ह्याय् निरिशा बस्नेतं नं कलिउडय् थःगु पलाः न्ह्याकेधुंकूगु दु ।
थगुुने निरिशाया डेब्यु फिल्म “जानी नजानी” पिदंगु खःसा थ्वसिबें न्ह्यः निरिशां बलिउडय् “चन्द्रनन्दिनि” नांयागु टिभि सिरियल म्हिते धुंकूगु दु ।
गुलिखे सेलिब्रिटीया म्ह्याय्पिंसं हिरोनीया रुपय् थःगु पलाः न्ह्याकलसा गुलिसिनं फिल्मया मेमेगु विधाय् नं पलाः न्ह्याकूगु दु । उकी मध्ये तसकं नांजाःम्ह फिल्मकःमि तुलसी घिमिरेया निम्ह म्ह्याय्पिं भावना घिमिरे व पञ्चमी घिमिरे खः ।
मचाबलय् उमिसं छगूनिगू फिल्मय् बालकलाकार जुयाः म्हितूगु दुसा आः वयाः उमिसं फिल्मया हे मेमेगु क्षेत्रय् थःगु पलाः न्ह्याकूगु दु । उपिं मध्ये भावनां कला निर्देशकया रुपय् पलाः न्ह्याकूगु दुसा पञ्चमीं सहायक निर्देशकया रुपय् थःत न्ह्यब्वःगु दु ।
थथे फिल्मया मेमेगु ख्यलय् ल्हाः तःम्ह मेम्ह छम्ह धयाम्ह नांजाःम्ह फिल्मकःमि अशोक शर्माया म्ह्याय् कृति शर्मा नं खः । अशोक शर्माया म्ह्याय् कृतिं छम्ह सहायक निर्देशकया रुपय् थःहे अबुयात ग्वाहालि यानाच्वंगु दुसा लिपा वनाः थः हे फिल्म निर्देशक जुइगु मति तयाच्वंगु दु ।
आपाः यानाः थथे पुलांपि सेलिब्रिटीया म्ह्याय्पिंसं हिरोनीया रुपय् न्ह्याकूगु पलाः धाःसा उलि ताःलाःगु खनेमदु । तर पुलांपिं मध्ये नांजाःम्ह रंगकर्मि व फिल्म निर्देशक बद्रि अधिकारीया म्ह्याय् केकी अधिकारीया पलाः धाःसा आःतक न्ह्यानाच्वंगु हे दनि । जबकि वयागु फिल्म उलि हिट धाःसा जूगु मदुनि ।
नेपाःया फिल्म ख्यलय् केकीयात छम्ह तसकं हे धिसिलाक्क अभिनय याइम्ह हिरोनीया रुपय् कयातःगु दु । अथे जूगुलिं वयागु फिल्म हिट मजूसां वयात थःगु फिल्मय् काइपिनिगु ल्याः धाःसा गबलें म्हो मजू । आः वयाः पुलांम्ह हिरोनी झरना थापाया म्ह्याय् सुहाना थापां नं थःगु न्हापांगु फिल्म “ए मेरो हजुर३” य् तसकं बांलाक अभिनय याना थः छम्ह स्टारपुत्री जुयाः जक फिल्मय् वयागु मखसे थःके प्रतिभा दुगुलिं हे हिरोनीया रुपय् पलाः न्ह्याकागु खः धयागु खँया दसु न्ह्यब्वःगु दु ।
खय्तला कलिउडय् हिरोनीया जुयाः पलाः न्ह्याकेत कुतः याःम्ह भावना रेग्मी नं छम्ह सेलिब्रिटीया हे म्ह्याय् खः । वया अबु शिव रेग्मी नेपाःया तसकं हे नांजाःम्ह फिल्म निर्देशक खः । आफन्त, आफ्नो मान्छे, सुखः दुख, ए मेरो हजुर, कहाँ भेटिएला थेंज्याःगु आपालं हिट फिल्मया निर्देशक खः ।
हिट– सुपरहिट फिल्म दयेकूम्ह अबु शिव रेग्मीया म्ह्याय् जुलं नं भावनाया हिरोनी जुइगु पलाः धाःसा सुथां लाये मफुत । जबकि भावनायात वया थःहे अबु शिव रेग्मीं थःगु फिल्म “सो सिम्पल” पाखें कलिउडय् हिरोनीया रुपय् डेब्यू याकूगु खः । भावना रेग्मीया पलाः सुथां मलाःगुयात सु नं कलाकार थः मां अबुया नामं मखसे थःगु हे प्रतिभा व मिहेनतं जक हे लोकंह्वाइ धयागु खँया दसु कथं कायेमाः ।
LEAVE YOUR COMMENTS