‘स्वरे छंगु मतिना …. या म्यूजिक भिडियाे लञ्च

येँ – नेपालभाषा सांगीतिक ख्यलय् न्हू प्रतिभाया रुपय् पिलू वयाच्वंपिं वीरेन्द्र महर्जन व सुमित्रा महर्जनया न्हूगु ज्वःम्येँया म्युजिक भिडियो पिहां वःगु दु । महर्जन निम्ह तिपूया सलय् दुथ्यानाच्वंगु ‘स्वरे छंगु मतिना स्वतुमतु स्वःगु ….’ बोलया म्येँया म्युजिक भिडियो वंगु शनिवाः पितब्वज्या जूगु खः ।

म्येँ हालामि सुमित्रा महर्जनया मां बसुदेवी व अबु बेखानारायण महर्जनया सभापतित्वय् जूगु ज्याझ्वलय् कलानिधि इन्दिरा संगीत महाविद्यालयया महासचिवलिसें सहायक प्रिन्सिपल वरिष्ठ संगीतज्ञ धनबहादुर गोपाली मूपाहांकथं झायादीगु खः । म्युजिक भिडियो पितब्वज्या ज्याझ्वलय् नांजाःम्ह म्येँ हालामि संगीता शाक्य, नेपालभाषा म्युजिक भिडियोया न्हापांम्ह निर्देशक विजयरत्न असंबरे विशेष पाहांकथं झायादीगु खः ।

नांजाःम्ह संकिपाकःमि सुरेन्द्र तुलाधरं च्वयादीगु व संगीतकार सुरेन्द्र श्रेष्ठं लसय् हनादीगु म्येँया म्युजिक भिडियोया निर्देशन नांजाःम्ह निर्देशक रामकृष्ण खड्गीं यानादीगु खः । सरिता वज्राचार्य, किरण जोशी व निभा डंगोलं अभिनय यानादीगु म्युजिक भिडियोया छायाँकन रकि महर्जनं यानादीगु खःसा सम्पादन बालकृष्ण बंशीं यानादीगु खः ।