
विश्वय् लोकंह्वाःगु लाकां कम्पनी नाइकीं दयेकातःगु छज्वः ऐतिहासिक लाकाः ४ करोड ८३ लाख ८० हजार तकाः लिलाम जूगु दु । न्यूयोर्कय् जूगु लिलामय् तयातःगु थ्व लाकाः नाइकीया सह संस्थापक बील बाओरम्यानं डिजाइन यानातःगु खः । थ्व लिलामीइ थीथी कासाय् छ्यलीगु सछिज्वः लाकाः मिइत तःगु खः, गुकी मध्ये सन् १९७२ य् दयेकूगु थ्व छजु लाकांयात जक ४ लाख ३७ हजार ५०० डलरं न्याःगु खः ।
थ्व लाकां न्याइम्ह क्यानेडेली लगानीकर्ता माइल्स नाडालं मेगु ९९ ज्व लाकां नं ८ लाख ५० हजार डलरं न्यानाकाःगु खः । दकलय् अप्वः ध्यबा पूगु नाइकी वाफल रेसिङ फ्ल्याट मुन नांया थ्व सन् १९७२ या ओलम्पिक छनोटया निंतिं सूगु लाकां खः । ल्हातं हे सुयातःगु थज्याःगु डिजाइनया झिंनिजु लाकां सूगु खः ।
थुपिं लाकांत १९७२ या ओलम्पिक कासाया झ्वलय् कासामितय्त इनाबिउगु खः । तर लिलामय् तःगु लाकां धाःसा सुनानं मछ्यःगु छजू जक लाकां जूगु खँ धाःगु दु । क्यानेडेली व्यापारीं लिलाम सकारे यानाकाःगु थ्व लाकां खेलकूद इतिहास व पप संस्कृतिया ऐतिहासिक अंश जूगु खँ धयादीगु दु ।
वय्कलं थ्व लाकां फुक्कं टोरन्टोय् च्वंगु थःगु निजी गाडी संग्रहालयय् प्रदर्शनीइ तयेगु खँ धयादीगु दु । थ्वयां न्ह्यः छुं नं लाकांयात दकलय् अप्वः ध्यबा पूगु धयागु १ लाख ९० हजार ३७३ डलर खः । सन् १९८४ या ओलम्पिकय् बास्केटबलया फाइनलय् माइकल जोर्डनं न्ह्याःगु उगु लाकाः वयागु हे हस्ताक्षर सहित सन् २०१७ य् मिउगु खः ।
LEAVE YOUR COMMENTS