त्रिभुवन विमानस्थलय् न्हूगु पार्किङ्ग वे

येँ – त्रिभुवन अन्तर्राष्ट्रिय विमानस्थलय् तग्वःगु जहाज पार्किङ्ग यायेछिंक न्हूगु रिमोर्ट पार्किङ्ग व दयेकूगु दु । विमानस्थलया क्षमता विस्तार यायेगु झ्वलय् उत्तरपूवी क्षेत्रय् न्हूगु पार्किङ्ग वे दयेकूगु खः । उगु पार्किङ्ग क्ष्ँेत्रय् वाइडबडी क्षमताया निगः व न्यारो बडी क्षमताया स्वंगः जहाज पाकिङ्ग यायेफइ ।

न्हूगु पार्किङ्ग मंगलवाःनिसें हे संचालनय् वःगु खँ विमानस्थलया महाप्रबन्धक राजकुमारी क्षेत्रं कनादीगु दु । न्हूगु पार्किङ्ग लिसें अन्तर्राष्ट्रिय पार्किङ्ग वेया ल्याः ११ थ्यंगु दु । महाप्रबन्धक क्षेत्रीं पार्किङ्ग क्षेत्र दयेकागुलिं विमास्थलया चाप व्यवस्थापन सहज जुइगु खँ धयादीगु दु ।

जहाज पार्किङ्ग यायेगु थाय् मदयाः नं विमानस्थलय् अवतरण यायेमाःगु विमान आकाशय् होल्ड यानातयेमाःगु खँ धासें वय्कलं आः अज्याःगु अवस्था नं मवइगु खँ धयादीगु दु । थ्यंमथ्यं ४० करोड ५० लाख लागतय् झिंखुला बिकाः थुगु पार्किङ्ग वे दयेकूगु खः । छगू जक धावनमार्ग दुगु व गाक्क पार्किङ्ग वे नं मदुगुलिं त्रिभुवन विमानस्थलय् अप्वः ट्राफिक चाप लानाच्वंगु खः ।

विमानस्थलया दक्षिणपूर्व क्षेत्रय् नं न्हूगु पार्किङ्ग वे दयेकाच्वंगु दु । थन नं निगः वाइडबडी जहाज दिकेफइगु खँ धाःगु दु ।सामान्यतः अन्तर्राष्ट्रिय विमानस्थलय् छुं नं जोखिमपूर्ण विस्फोटक पदार्थ कुबिया वःगु वा अपहरणकारीं कब्जा यानातःगु विमान दिकेमाल धाःसा मू पार्किङ्ग क्षेत्र स्वयां छुं तापाक रिमोर्ट पार्किङ्ग वे दयेकी ।

अन जहाज तयेगु अर्थ सम्भावित क्षति म्हो यायेगु खः । त्रिभुवन अन्तर्राष्ट्रिय विमानस्थलय् न्हापांखुसी थज्याःगु पार्किङ्ग वे दयेकूगु खः ।
थौंकन्हय् अन्तर्राष्ट्रिय विमानस्थलया इतिहासया हे न्हापांखुसी मू रनवे नं पूवकं हे ल्ह्वनेज्या (रनवे रिह्याब) ज्या जुयाच्वंगु दु । रनवे ल्ह्वनेज्या ६० प्रतिशत क्वचायेधुंकूगु खँ महाप्रबन्धक क्षेत्रीं धयादीगु दु । वंगु चैत १८ गते निसें बहनी १० बजे निसें सुथय् ८ बजे तक न्हि झिघौ विमानस्थलया रनवे ल्ह्वनेज्या जुयाच्वंगु खः ।

सम्बन्धित बुखँ

LEAVE YOUR COMMENTS