अमेरिकी नरसंहारया ७५ दँ

नेपालय् कम्युनिष्ट पार्टीया स्थापना जुइ निदँ स्वदँ न्ह्यः विश्वय् निगूगु विश्ययुद्ध जुयाः अमेरिकी साम्राज्यवादं नरसंहार याःगु खः । थौं नं विश्वया महाशक्ति राष्ट्र कथं अमेरिकां थःपिंत छगू सुनानं छुं याये मफइगु मुलुक कथं तायेकाच्वंगु दु। थ्व अवधिइ आपालं परिवर्तन वयेधुंकूगु दु। आर्थिक कारणं जक मखु कि विश्वया थीथी देसय् सेना छ्वयाः थःपिनि हैकम कायम याना तयेमाःगु परिस्थिति अमेरिकी साम्राज्यवादी शक्तियात वःगु कारणं थ्व तसकं थिकेगु ज्या जुयाबिउगु दु। उकिं नं छसिकथं थ्व देय् पतनपाखे वनाच्वंगु महसुस विश्व समुदायं यानाच्वंगु दु। छगू इलय् चीन तसकं निरिह व थीथी देय्या कब्जाय् लानाच्वंगु देय् खः ।

थौं वयाः चीन अमेरिकी साम्राज्यवादयात टक्कर बिइफइगु देय् जुयाबिउगु दु। जापानलिसें ल्वानाः थःपिंत मुक्त यानातःगु देय् चीन, अमेरिकालिसें ल्वानाः विकास शून्य अवस्थां परिवर्तनशील जुया न्ह्यज्यानाच्वंगु देय् जापान थौं विश्वया न्हय्गू विकसित देय् जी सेभेन दुने थ्यानाच्वंगु दु। थ्व छगू ल्याखं साम्राज्यवाद विरुद्ध ल्वाल्वां विकास जूगु देय् धाःसां छुं पाइमखु। अमेरिकी साम्राज्यवादया सोच न्ह्याथे यानाः नं थ्व विश्वयात थःपिसं धयाथें तयातयेगु खः । छगू इलय् विश्वय् गनं द्यः लुकुं मबिइगु देय् धकाः बेलायतयात धयातःथें थौं अमेरिकां नं थीथी मुलुकय् सेना व नवसेनात छ्वयाः अन थःपिनि थाय् कब्जा यानाच्वंगु जक मखु कि अनया कृषि उत्पादन, सामान व थीथी कथंया आर्थिक क्रियाकलापय् नं सक्रिय सहभागी जुयाच्वंगु दु। छगू ल्याखं थ्व छगू देसं मेगु देय् प्रतिया हस्तक्षेप खः । अथे खःसां अन्तर्राष्ट्रिय ब्यापार ब्यवसाय खुल्ला यायेगु रणनीति कथं थ्व स्वीकृति प्राप्त यानाः यानाच्वंगु अवस्था जूगु कारणं गुगुं नं देसं छुं नं कथं खँ ल्हायेगु थाय् मदयाच्वंगु खः । मखुत धाःसा विश्वयात त्राही त्राही यानातःगु अमेरिकी साम्रज्यवादं थौं विश्व दथुं बिदा जुइधुंकीगु खइ । स्वतन्त्र अमेरिकी जनता स्वतन्त्रता प्राप्त यानाः स्थानीय रैथानेतय् हैकम कायम जुइधुंकल जुइ । तर अज्याःगु वातावरण थौं तकं कायम याये फुगु मदुनि। अमेरिकी साम्राज्यवाद विरुद्ध सः थ्वयेकीपिनि अभावया कारणं नं थौं विश्वया दथुइ थज्याःगु शक्तियात नायेकीगु शक्ति उत्पादन मजूगु खः ।

थौं स्वयां न्हय्न्यादँ न्ह्यः आणविक हतियारया प्रयोग न्हापांखुसी जूगु इलय् अमेरिकां जापानया हिरोसिमा व नागासाकी धइगु निगू शहरय् बम विस्फोट याःगु इलय् छगू लाख स्वीद्वः मनूत छक्वलं सिगु खः । सीपिं ला सित, मंत । तर स्वंगू लाख व न्यय्द्वः मनूत सिइ नं मफु, म्वाये नं मफुया स्थितिइ लाःगु खः । ल्हाः तुति मदुपिं, छ्यं तज्याःपिं, मिं पुनाः वाथावाथा कनाच्वंपिं, बँय् हि बाः वंक नं ग्वाहालि ग्वाहालि धकाः ग्वाहालि फ्वनाच्वंपिं लाखौं लाख जापानीतय् सराप थौं नं अमेरिकी साम्राज्यवादं फयाच्वंगु दु। थ्व दर्दनाक घटनाया लागिं अमेरिकी साम्राज्यवादी शक्ति दोषी खः । तप्यंक दुश्मनी मखुसां अमेरिकी साम्राज्यवादी शक्तियात सखाप याये फइगुपति विश्वया न्हूगु शक्ति कम्युनिष्ट शासन पद्धति रुसय् लागू जुइधुंकूगु अवस्थाय् जापानय् नं उकिया प्रभाव लाइगु ग्याःचिकुं जक जापान ध्वस्त यानाः अमेरिकी साम्राज्यवादं थःपिनि ताण्डव नृत्य अन ब्वयाक्यंगु खः ।

स्वस्वं आकास ख्यूंसे च्वनावंगु, शहरन्यंकं मिया ज्वाला ह्वानाक्क च्यानावःगु, द्वलंद्वः मनूत च्यानाः झौ जूगु, हि हि जक यानाः नं गुलिं मनूत लँय् सतकय् ब्वाँय्ब्वाँय् जुयाच्वंगु व भयानक दृष्य अकल्पणीय खः । अज्याःगु दृष्य खंपिं गुलिं जापानी जेष्ठ नागरिकतय्सं आः नं अमेरिकी साम्राज्यवादयात थुकलं कि थुकलं बियाच्वंगु दु। थज्याःगु दर्दनाक दृष्य गब्लें गबलें मजुइमाः धकाः कामना यानाच्वंगु दु। थ्व अगष्ट ९ कुन्हु जापानया मेगु शहर नागाशाकीइ ८० हजार जापानी नागरिकया ज्यान वंक जूगु छगू दर्दनाक घटनायात थन न्ह्यथना च्वनागु खः ।

जापानय् कम्युनिष्ट झण्डा मब्वयेमाः धइगुहे ताः तयाः थज्याःगु हठकंडा अब्ले अमेरिकी साम्राज्यवादी शक्तिं क्यंगु खःसां विश्वया थीथी देसय् विश्वय् दकलय् लिपांगु व वैज्ञानिक वाद जुयाच्वंगु मार्क्सवादया धारणां प्रेरित कम्युनिष्ट विचार शक्ति धाःसा धमाधम न्ह्यचिलाच्वंगु हे दनि ।

अमेरिकी साम्राज्यवादी आक्रमणया प्रभावं थौं तकं उगु थासय् घाँय् तकं बुइ मफुगु अवस्था दनि धाइ । मस्त बूसां अपांग जुयाः बुइगु समस्या दनि । अथे जुयाः नं न्हय्न्यादँ न्ह्यः जूगु हिरोशिमा बम आक्रमणया थ्व घटनायात थौं तक नं विश्व मानव इतिहासया दकलय् निन्दनीय हाकूगु न्हि कथं कयातःगु दु। अमेरिकी साम्राज्यवादं अब्ले चीन लगायत उत्तरपूर्वी एशियाया तःगू देसय् कब्जा यानातःगु खः । निगूगु विश्वयुद्ध जूगु इलय्ज र्मनी, इटाली, जापान मंकाः शक्ति कथं खनेदुगु खः । अब्ले संयुक्त राज्य अमेरिका, बेलायत, फ्रान्स, सोभियत संघ तकं अलाइट कथं मोर्चाबन्दी जूगु खः । उकिं नं थःपिनि मू दुश्मन मखुगु स्वतन्त्र देय् जापानय् बम कयेकाः थौं थें हे अमेरिकी साम्राज्यवादं पश्चिमा दर्शनया उत्कृष्ट दर्शन कम्युनिष्ट धारयात निमित्यान्न यायेत स्वःगु खः धइगु क्यं ।

अमेरिकी साम्राज्यवादं न्हापांगु विश्वयुद्धया कारणं समाजवादी मुलुक कथं खने दयावःगु सोभियत रुसया प्रभाव जापान तकं वनी धइगु ग्याचिकुं थःपिनि जिम्माय् तकं मलाःगु जापानया हिरोशिमा व नागाशाकी शहरय् आणविक बम बिस्फोट यानाः गब्लें विश्वय् मजूनिगु नरसंहारया उदाहरण प्रस्तुत यानाबिउगु खः । थथे जापानय् कम्युनिष्ट झण्डा मब्वयेमाः धइगु हे ताः तयाः थज्याःगु हठकंडा अब्ले अमेरिकी साम्राज्यवादी शक्तिं क्यंगु खःसां विश्वया थीथी देसय् विश्वय् दकलय् लिपांगु व वैज्ञानिक वाद जुयाच्वंगु माक्र्सवादया धारणां प्रेरित कम्युनिष्ट विचार शक्ति धाःसा धमाधम न्ह्यचिलाच्वंगु हे दनि ।

सन् १९४५ या अगष्ट महिनाय् अमेरिकी साम्राज्यवादी शक्तिया सेनां जापानयात आक्रमण यानाः उगु देय्यात आत्मसमर्पण याकेगु सोच दयेकूगु खः । उकिं हे आकाझाकां सुनानं वा हे मचायेक आकासं उगु बम कयेकूगु खः । गुगु बमया प्रभावं थुलि क्षति जुइ धइगु स्वयम बम कयेकूम्ह छम्ह ल्याय्म्हम्ह सैनिक अफिसरं तकं याये मफुगु खः । थौं नं अमेरिकी साम्राज्यवादया प्रभाव विश्वन्यंकं दु। माल धाःसा न्ह्यागुं यायेफु धइगु कथं हे वं सद्धाम हुसेनयात खतम यात । लिविया ध्वस्त यात । ओसामा वीन लाडेनयात स्यात ।

अमेरिकी साम्राज्यवादं कम्युनिष्ट प्रभावयात पनेगु नियतं लाखौं मनू स्यातं नं विश्वय् थौं नं अमेरिकी साम्राज्यवाद विरुद्ध जनलहर धाःसा चले हे जुयाच्वंगु दनि । थःपिंसं दयेकागु बमया प्रभाव छु गुलि जुइ धइगु प्रमाणित यायेत छगू प्रयोग कथं नं जापानय् थ्व बम बिस्फोट याःगु खः धइगु अब्ले इतिहासकारतय्सं धयातःगु दु ।