
थःपिनि माग वेवास्ता याःगुलिं चोभाःया जनता आन्दोलित
येँ – स्थानीय वासिन्दातय्सं याःगु विरोधया कारणं स्थगित जूगु चोभाःया सुख्खा बन्दरगाह दयेकेगु ज्या आः हानं न्ह्यानाच्वंगु दु । वंगु साउन १७ गतेनिसें चिनियाँ कम्पनी साक्षी व नेपाःया कम्पनी आशिष जानाः उगु बन्दरगाह दयेकेगु ज्या न्ह्याकूगु खः । झिंच्याला दुने निर्माण ज्या क्वचायेकेगु ताः तयाः धमाधम ज्या जुयाच्वंगु खँ धाःगु दु ।
स्थानीय वासिन्दाया विरोध लिपा नं आः सुख्खा बन्दरगाह दयेकेगु ज्या न्ह्यानाच्वंगु खँयात कयाः चोभार संरक्षण समितिं विरोध यासें याकनं हे आन्दोलन यायेगु खँ धाःगु दु ।समितिया अध्यक्ष पञ्चलाल महर्जनं ‘नेपालभाषा टाइम्स’ लिसे खँ ल्हासें आन्दोलनया निंतिं सहलह जुयाच्वंगु जानकारी बियादिल । वय्कलं थःपिंसं न्हापा यानागु विरोधया सुनुवाइ मजूगु कारणं आः याकनं हे विरोधया ज्याझ्वः घोषणा यायेगु तयारी जुयाच्वंगु खँ कनादिल ।
वंगु साउन ३० गते प्रधानमन्त्री केपी शर्मा ओलीं थ्व सुख्खा बन्दरगाहया शिलान्यास यायेगु ज्याझ्वः दयेकातःगु खःसा उगु इलय् स्थानीय वासिन्दा लिसें स्थानीय जनप्रतिनिधितय्सं तकं शिलान्यास ज्याझ्वलय् वये मखु धायेवं शिलान्यास ज्याझ्वः स्थगित जूवंगु खः । चोभारय् सुख्खा बन्दरगाह दयेकल धाःसा उगु लागाय् वातावरण प्रदुषण अप्वइगु व उकिया लिच्वः स्वनिगलय् लाये फइ धासें वातावरणविदतय्सं समेत विरोध याना वयाच्वंगु दु ।
सुख्खा बन्दरगाह १ अर्ब २८ करोड तका खर्च यानाः दयेकेत्यंगु खः । वइगु झिंच्यालाया दुने क्वचायेकेगु कथं आः दयेकेगु ज्या न्ह्याकाच्वंगु दु । बन्दरगाह दयेकेगु ज्या क्वचायेवं भारतया कोलकाता, विशाखापट्नम, फुलबारी व चीनया केरुङ जुयाः सामान ज्वना वइगु गाडी तप्यंक चोभारय् दिके हइ । उगु सवारी साधनया भन्सार चेकजाँच लगायत फुक्कं ज्या नं चोभारय् तुं जुइगु खँ धाःगु दु ।
दुहां वइगु नाकाय् दुगु भन्सार ज्याकूपाखें लकिङ यानाः सवारी साधनयात येँय् छ्वया हइ । चोभारय् हे उगु सवारी साधनया चेकजाँच व भन्सार छुटे यायेगु ज्या नं जुइ । चोभाःया सुख्खा बन्दरगाहय् छक्वलं हे ४६४ गः कन्टेनर न्ह्यनीगु थाय्या व्यवस्था यायेत्यंगु दु । निगू खण्डय् ब्वथलाः दयेकेत्यंगु थ्व बन्दरगाहया न्हापांगु खण्डय् बन्दरगाहया संरचना व निगूगु खण्डय् भन्सार क्वार्टर दयेकेगु खँ धाःगु दु ।
थ्व बन्दरगाह थ्यंमथ्यं २०० रोपनी जग्गाय् दयेकेत्यंगु खः ।न्हापा हिमाल सिमेन्ट तयातःगु थ्व लागाय् सिमेन्ट कारखाना बन्द यायेवं आः पर्यटकीय लागा दयेकेगु स्थानीय जनताया ग्वसाः दु ।
LEAVE YOUR COMMENTS