सर्वोच्चया आदेशय् मि तल
नागरिकता विधेयक विवाद अझ तच्वल
येँ – जन्मया आधारय् नागरिकता काःपिनिगु सन्तानयात वंशजया नागरिकता बीत गृह मन्त्रालयं याःगु परिपत्र कार्यान्वयन मयायेत सर्वोच्च अदालतं बिउगु आदेशया विरोधय् देय्या थीथी थासय् प्रदर्शन शुरु जूगु दु । सर्वोच्चया आदेश विरुद्ध वीरगञ्ज व मोरङय् प्रदर्शन जूगु खः । वीरगञ्जय् सरकारय् दुथ्याःगु संघीय समाजवादी फोरमया सतीगु युवा व विद्यार्थीतय्सं म्हिगः प्रदर्शन याःगु खः ।
वीरगञ्जया घण्टाघर न्ह्यःने प्रदर्शन यायेगु झ्वलय् प्रदर्शनकारीतय्सं ‘जन्मसिद्ध नागरिकया सन्तानयात नागरिकतां बञ्चित याये दइमखु, नागरिकता विरोधी आदेश खारेज याः, नागरिकता विरोधी वकिलयात कारबाही या, गृह मन्त्रालयं नागरिकता सम्बन्धी जारी याःगु सर्कुलर लागू या’ धकाः च्वयातःगु प्लेकार्ड प्रदर्शन याःगु खः ।
प्रदर्शनया झ्वलय् प्रदर्शनकारीतय्सं सर्वोच्च अदालतया निर्णय च्याकेगु लिसें तत्काल उकियात भिंकेगु ज्या मयात धाःसा तच्वःगु आन्दोलन यायेगु ख्याच्वः नं बिउगु दु ।
वि.सं २०६३ सं जन्मया आधारय् नागरिकता कयातःपिनि सन्तानयात वंशजया हे आधारय् नागरिकता बिउ धकाः संविधानय् न्ह्यथनातःगु धासें प्रदर्शनकारीतय्सं संकीर्ण मानसिकता दुपिंसं मधेशीतय्त नागरिकताबिहीन दयेकाः देशय् द्वन्द्वया पुसा पीत स्वःगु द्वपं नं प्रदर्शनकारीतय्सं बिउगु दु ।सर्वोच्च अदालतया आदेशयात कयाः जिल्ला प्रशासन कार्यालय मोरङय् नं प्रदर्शन जूगु दु ।
नागरिकता दयेकेत जिल्ला प्रशासन कार्यालय वंपिं ल्याय्म्हतय्सं प्रदर्शन यायेगु झ्वलय् प्रधानमन्त्री केपी शर्मा ओली विरुद्ध नाराबाजी नं याःगु दु । महेन्द्र चोकय् जम्मा जूपिं ल्याय्म्हतय्सं केपी ओली मुर्दाबाद, गृहमन्त्री राजीनामा बिउ धकाः नाराबाजी याःगु खः । गृह मन्त्रालयं पत्रचार यायेधुंकाः वीरगञ्ज व मोरङ गुलिखें मनूतय्त नागरिकता बीगु ज्या जुइधुंकूगु दु । तर सर्वोच्चया आदेश लिपा हाकनं नागरिकता बीगु ज्या बन्द जुइवं मधेशय् थ्व प्रदर्शन जूगु खः ।
गन ग्वःगू नागरिक जारी जुल
गृह मन्त्रालयं वंगु चैत १९ गते सर्कुलर जारी यायेधुंकाः मुक्कं १२९३ गू नागरिकता जारी जूगु दु । गृह मन्त्रालया सर्कुलर लिपा मोरङय् ६२३ वंशजया नागरिकता जारी जूगु दु । अथेहे झापाय् ४०० नागरिकता वितरण जूगु दु । सर्लाही २३९ , सप्तरी १९, सिराहालय् ६, बारा व पर्साय् स्वंगू स्वगू नागरिकता वंशजया आधारय् जारी जूगु दु । नागरिकता सम्बन्धी थ्व प्रावधानयात कयाः संसदया सांसदतय् नं विभाजित जुयाच्वंगु दु ।
LEAVE YOUR COMMENTS