काठमाडौं नेवाः किन्डरगार्टेनय् यःमरि धेंधेंबल्लाः व ब्वज्या

येँ- काठमाडौं नेवाः किन्डरगार्टेनय् दँय्दसं थें थुगुसी नं यःमरि धेंधेंबल्लाः कासा व ब्वज्या जुल । किन्डगार्टेनपाखें वंगु झिंन्यादँ न्ह्यवंनिसें थुकथं ब्वनेकुथिया मस्तय् अभिभावकपिनिगु दथुइ यःमरि धेंधेंबल्लाः कासा व ब्वज्या याना वयाच्वंगु दु ।

मस्तलिसें अभिभावकपिंत भाषा, संस्कृतिलिसें नेवाः परम्पराय् अभ्यस्त याना यंकेगु ल्याखं ब्वनेकुथिं थुकथं नेवाः संस्कृतिया थीथी पक्षयात कयाः प्रत्यक्ष रुपं हे वंगु झिंन्यादँ न्ह्यवंनिसें गतिविधि संचालन याना वयाच्वनागु किन्डरगार्टेनया निर्देशक राजेन्द महर्जनं ‘नेपालभाषा टाइम्स’यात जानकारी बियादिल ।

थुगुसी जूगु यःमरि दयेके धेंधेंबल्लाः कासाय् ब्वनेकुथिया युकेजी तगिमय् ब्वनाच्वंम्ह मिजल महर्जनया अभिभावक रजिना महर्जन उत्कृष्ट जुयादीगु खः । वय्कःयात मूपाहांकथं झायादीम्ह लोकंह्वाःगु संकिपा जामनः गुभाजुया परिकल्पनाकार लिसें कलाकार सुशील राजोपाध्यायं दसिपौ लःल्हानादीगु खःसा किन्डरगार्टेनया निर्देशक महर्जनं मूपाहां राजोपाध्याययात मतिनाया चिं लःल्हानादीगु खः ।
मूपाहां राजोपाध्यायं नेवाः संस्कृतिइ यःमरिया महत्व लिसें यःमरि पुन्हिया बारे कनादीगु ज्याझ्वलय् ब्वनेकुथिया युकेजी तगिंया झिम्ह विद्यार्थीया अभिभावकं ब्वति कयादीगु खः ।

लुमंकेबहजू ब्वनेकुथिपाखें यःमरि पुन्हिलिसें नेवाः संस्कृृति, नखःचखः, जात्रा आदि बारे मस्त व अभिभावकयात नं जानकारी बीगु ल्याखं स्वन्तिया इलय् विद्यार्थीतय्त मंकाः म्हपुजा, सकिमिला पुन्हिबलय् हलिमलि ब्वज्या व कासा लगायत थीथी ज्याझ्वः वंगु झिंन्यादँ न्ह्यवंनिसें याना वयाच्वंगु दु ।

नेपालभाषा टाइम्स

च्वमिया मेमेगु

• थुकथं न्ह्यात बोडेया म्ये प्वाः खनीगु जात्रा
• बिस्काःया झ्वलय् थिमिइ ‘सुथसिया याः’ न्यायेकल
• छायादेवीया जग्गा पुखू प्रमाणित
• पाहाँचःह्रे क्वचाल
• ताेखाय् बिस्काःया निंतिं यःसिं थन