ख्वाउँ अप्वयाः सीपिं झिम्ह थ्यन

येँ (नेपालभाषा टाइम्स)
येँय् अप्वयाच्वंगु ख्वाउँया झ्वलय् थौं झन् हे तापक्रम कुहां वःगु दु । थौं सुथय् येँया तापक्रम ०.५ डिग्री सेन्टिगे्रट थ्यंगु दु । मौसमविद् वरुण पौडेलया कथं थ्व तापक्रम अझ हे कुहां वनीगु सम्भावना दनि । आः वइगु छवाः तक तापक्रम थहां वनीगु सम्भावना मदु । येँया तापक्रम कुहां वनाः माइनस ३ डिग्री तक थ्यने फुगु अनुमान जुयाच्वंगु दु ।
थ्व वालय् वा वइगु वा च्वापु वा गाइगु छुं सम्भावना मदुगुलिं तापक्रम थुकथं हे कुहां वयाच्वनीगु खँ नं मौसमविद्तय्सं धाःगु दु ।
वंगु २४ घौया दुने देय्या फुक्क हे जिल्लाया तापक्रम कुहां वःगु दु । थुकी मध्ये दकलय् कम तापक्रम थ्यंगु जिल्ला धाःसा जुम्ला जूगु दु । थौं सुथय् जुम्लाया तापक्रम माइनस ८ डिग्री थ्यंगु दु ।
मेखे तराईया थीथी जिल्लाय् धाःसा शितलहर वयाः मनू सीगु क्रम समेत शुरु जूगु दु । थौं नं सप्तरी जिल्लाया खड्ग नपाय् च्वंम्ह ७० दँया मुसहरू चौधरी चिकुयाः सीगु दु । तराई लागाय् चिकुयाः सीपिं मनूतय् ल्याः १० म्ह थ्यंगु दु । उकी मध्ये अप्वः मस्त नं लाःगु दु ।
तसकं चिकुयाः तराईया जनजीवन समेत प्रभावित जूगु दु । मनूत पिहां वयेगु कम जूगु दुसा थाय्थासय् मि च्याकाः पुचः पुचः मुनेगु ज्या जुयाच्वंगु दु । ख्वाउँ अप्वयेवं स्कूल समेत छुं न्हिया लागिं बन्द याना बिउगु दु । अन सरकारी व निजी ज्याकू समेत प्रभावित जुयाच्वंगु दु ।