अमेरिका–चीन दथुइ हाकनं कर वृद्धि

अमेरिका व चीन दथुइ व्यापार युद्ध झन झन तच्वया वःगु दु । थ्वहे दथुइ बिहिवाः निगुलिं देशं थीथी सामानय् थप कर वृद्धिया घोषणा याःगु दु । निगुलिं देशं छगू देशं मेगु देशय् आयात जुइगु सवारी साधन, कारखाना उपकरण व मेमेगु सामग्रीइ यानाः अर्बौं डलरया करवृद्धिया घोषणा याःगु खः ।

वंगु निलाया दुने बुधवाः निगू देय् उच्च अधिकारीतय् दथुइ जूगु निक्वःगु बैठकय् च्वनेधुंकाः निगुलिं देशं करय् २५ प्रतिशत वृद्धि याःगु खः । बुधवाः सुरु जूगु वार्ताया विस्तृत विवरण धाःसा पित बिउगु मदुनि । वार्ताय् खँ मिले मजुइवं सवारी साधन व धातुजन्य वस्तुइ यानाः निगुलिं देशं १६ अर्ब डलर बराबरया सामग्रीय दण्ड जरिवाना लगे जुइगु घोषणायाःगु खः ।

वंगु महिनाय् नं निगुलिं देशं वं वयात, वं वयात ३४ अर्ब डलरया बराबरया सामानय् करवृद्धि घोषणा याःगु खः । थ्व निगुलिं यानाः आः ५० अर्ब डलर बराबरया सामानय् करय् वृद्धि जूगु दु ।

थ्वहे दथुइ चीन सरकारं कर अप्वयेकेगु ज्याय् विश्व व्यापार संगठनया नियम उल्लंघन यानाच्वंगु धासें अमेरिकाया आलोचना याःगु दु । थुकिया विरुद्ध चीनं कानुनी प्रक्रियाय् वनेगु खँ नं धाःगु दु । अमेरिकां राज्यया हे अग्रसरताय् प्रविधि विकासया ज्या दिकेत बेइजिङयात दबाब बियाच्वंगु दु, तर चीनं उकियात अस्वीकार याना वयाच्वंगु दु ।