लोकसेवा विज्ञापन विरुद्ध निन्हु नेपाल बन्द
येँ – देय्न्यंकंया स्थानीय तहया लागिं कर्मचारी भर्ना कायेत लोकसेवा आयोगं पिकाःगु विज्ञापन असमावेशी जूगु धासें नेपाल आदिवासी जनजाति महासंघं नेपाल बन्दया घोषणा याःगु दु । थ्वहे वइगु साउन २ गते व १० गते निन्हु नेपाल बन्द यायेगु घोषणा महासंघं याःगु खः ।
बन्दयात ताःलाकेगु निंतिं समावेशी आन्दोलनया निंतिं नेवाः समन्वय समिति नीस्वंगु दु ।
नेवाः देय् दबूया नायः नरेश ताम्रकारया संयोजकत्वय् १०१ म्ह दुजः दुगु समिति गठन याःगु खः । समितिया छ्यांज्ये कथं श्रीकृष्ण महर्जन च्वनादीगु दु । थीथी राजनीतिक पार्टीया नेवाः संघ संस्थाया प्रतिनिधि, नेपाल आदिवासी जनजाति महासंघया अध्यक्ष जगत बराम, उपाध्यक्ष गोविन्द छन्त्याल, सचिव सुखदेव थामी, नेवाः न्ह्यलुवा डा. महेशमान श्रेष्ठं उगु भेलाय् ब्वति कयादीगु खः ।
ज्याझ्वलय् सडक विस्तार पीडित संघर्ष समितिया नायः सुमन साय्मि, सेभ नेवाः भ्यालिया शैलेश शाक्य, राजनीतिक जागरण अभियानया प्रेम सिल्पकार, राजेन्द्र श्रेष्ठ, पत्रकार श्रीकृष्ण महर्जन लगायतपिंसं थौंया इलय् समावेशिताया नितिं आन्दोलन यायेमाःगु बारे बिचाः तयादीगु खः ।
भेला क्वचायेकाः अनं तुं जुलुस पिकाःगु खः । उगु जुलुस असनय् वयाः क्वचायेकूगु खः । म्हिगः च्वंगु समन्वय समितिया बैठकं महासंघं घोषणा याःगु नेपाल बन्द ताःलाकेगु निंतिं थीथी ज्याझ्वः नं यायेगु घोषणा याःगु दु । आन्दोलनया न्हापांगु चरण कथं थौं बहनी मसाल जुलुस पिकायेगु तयारी जुयाच्वंगु खँ नेवाः देय् दबूया नायः नरेश ताम्रकारं ‘नेपालभाषा टाइम्स’यात कनादिल ।
अथेहे कन्हय् सिट्टी पुयाः जुलुस पिकाइगु जूगु दुसा कंस फिब्व ख्यलय् जनप्रदर्शन यायेगु तयारी जुयाच्वंगु दु । लोकसेवा आयोगं पिकाःगु विज्ञापन समावेशी मजू धासें आदिवासी जनजातितय्सं निरन्तर आन्दोलन याना वयाच्वंगु खःसा आन्दोलनयात मधेशी, मुस्लिम, दलित, अल्पसंख्यक, मिसा, उत्पीडनय् लाःपिं थीथी जातीय संस्थां नं ऐक्यबद्धता क्यनाः बन्द ताःलाकेगु निंतिं थःथःगु थासं तयारी यानाच्वंगु खँ सीदुगु दु ।
नेपाःया संविधान व कानून अःखः लोकसेवाया विज्ञापन वःगु धासें प्रदर्शन जुयाच्वंगु दुसा सर्वोच्च अदालतं तकं उगु विज्ञापनयात निरन्तरता बिउगुलिं उकिया विरोधय् नं थ्व बन्द यायेत्यनागु खँ जनजाति महासंघं धाःगु दु ।
LEAVE YOUR COMMENTS