शाक्य महाविहार संघ च्यादँ क्यन

येँ(नेपालभाषा टाइम्स)- शाक्य महाविहार संघ पलिस्था जूगु न्हय्दँ फुनाः च्यादँ क्यंगु दु । थ्व लसताय् संघं छगू बःचाधंगु ज्याझ्वः यासें च्यादँ बुन्हि हंगु दु ।येँ देय्या शाक्य कुलपुत्रया वन्द्याभिषेक याइगु बहाःया मंकाः संगठन शाक्य महाविहार संघ च्यादँ क्यंगु लसताय् जूगु ज्याझ्वः संघया नायः शुभकाजी शाक्यया सभापतित्वय् जूगु खः । ज्याझ्वलय् बागमति प्रदेश सांसद शैलेन्द्रमान वज्राचार्य मूपाहांकथं झायादीगु खः ।

ज्याझ्वलय् थःगु नुगःखँ तयादिसें मूपाहां प्रदेश सांसद वज्राचार्यं बौद्ध बहाः बहिलिइ ल्याय्म्ह पुस्ताया आकर्षण म्हो जुया वनाच्वंगु खँय् चिउताः प्वंकादिसें इमित थुखेपाखे आकर्षित याये फइकथंया ज्याझ्वः हयेमाःगु खँय् बः बियादिल । ल्याय्म्ह पुस्ताया नुगः त्याके फइकथं ज्या यायेमाःगु खँय्बः बियादिसें वय्कलं न्हू पुस्तायात उद्यमशीलताया ख्यलय् नं छ्यलेगु व उकिया निंतिं आवश्यककथंया तालिम बीगु ग्वसाः जुयाच्वंगु खँ कनादिल । संघय् आवद्ध बहाःया ल्याय्म्हतय्त ब्वति कायेकेगु निंतिं संघं हे आवश्यक पहल यायेमाःगु नं वय्कलं धयादीगु दु ।

महासचिव संघरत्न शाक्यं लसकुस यानादिसें संघं आतक याना वयाच्वंगु गतिविधिया बारे जानकारी बियादीगु खः ।नायः शाक्यं संघ स्थापनाया मू उद्देश्य शाक्यवंशया उत्थान व इतिहासया संरक्षण यायेत खः धयादिल ।