यलय् हुलाप्याखं बारे गोष्ठि

यल – धिम्बा डान्स एण्ड मोरया ग्वसालय् निन्हुयंकं नृत्य कार्यशाला गोष्ठि जुल । उगु गोष्ठि वंगु असार २१ व २२ गते निन्हुयंकं जूगु खः । गोष्ठिइ अन्तर्राष्ट्रिय ख्यलय् नां जाःम्ह नृत्य गुरु चरण प्रधान, अन्तर्राष्ट्रिय लोक नृत्य गुरु ज्याकलिन स्टिनवर्ग व नांजाःगु नृत्य प्रशिक्षक सुरोज महर्जनं प्याखंया थीथी पक्षयात कयाः नुगःखँ तयादीगु खः ।

ज्याझ्वलय् स्टिनवर्गं सहभागितय्त डच प्याखं नं स्यनादीगु खःसा गोष्ठिया मुख्य व्यक्तित्व प्रधानं हुलाप्याखं नापनापं म्हयात गुकथं ल्वचं तापाक तये फइ धइगु बारे जानकारी बियादीगु खः । वय्कलं हुलाप्याखंपाखें नं ल्वय्लिसे ल्वायेगु अनेक शक्ति दुगु व उकियात संचालन जक याये सयेकेमाः धासें प्रशिक्षण नं बियादीगु खः ।

अन्तर्राष्ट्रियस्तरया प्रशिक्षक प्रधान व स्टिनवर्गयात नेवाः परम्पराकथं तपुलिं पुइकाः, क्वखा व सिन्हाः तिकाः लसकुस याःगु गोष्ठिया न्हापांगु ब्वय् नृत्यगुरु महर्जनं नेपाःया मौलिक धिमय् प्याखं स्यनादीगु खः । निन्हुयंकं जूगु गोष्ठिया झ्वलय् अन्तर्राष्ट्रिय गुरु प्रधान व स्टिवर्गयात मतिनाया चिं नं लःल्हाःगु खःसा व स्टिनवर्गं संस्थायात आर्थिक ग्वाहालि नं यानादीगु खः ।