सेना व ख्वना दथुइ थौं नं वार्ता

येँ – फास्ट ट्राय्क विरुद्ध आन्दोलन याना वयाच्वंगु ख्वनाया स्थानीय जनता व नेपाःया सेनाया दथुइ थौं सहलह जुइगु खँ धाःगु दु । सेनां पौ च्वयाः हे स्थानीय जनतायात सहलह ज्याझ्वलय् ब्वति कायेत इनाप याःगु दु । थौंया बैठक येँय् च्वंगु आर्मी अफिसर्स क्लबय् च्वनीगु खँ धाःगु दु ।

सेनां फास्ट ट्रायकया विरोध याना वयाच्वंगु ख्वना, बुंग व भैसिपाटीया स्थानीय जनतायात सःताः सहलह यायेगु तयारी यानाच्वंगु खँ बुंगया सुरेन्द्र खड्गी कनादीगु दु । सेना छ्वयाहःगु पतिइ जनताया माग छु छु खः, डिमाण्ड छु छु खः धकाः न्ह्यसः तसें फास्ट ट्रायकयात कयाः माःगु सुझाव बीत नं उगु पतिइ इनाप यानातःगु जानकारी नं वय्कलं बियादीगु दु ।

फास्ट ट्रायक आयोजनाया सहायक रथि भरतबहादुर खड्कांं हस्ताक्षर यानातःगु पतिइ मुआब्जा विवाद बारे सहलह निष्र्कष पिकायेमाःगु व उगुयात मन्त्रिपरिषदया छ्वयेगु निंतिं थौंया सहलह ज्याझ्वलय् ब्वति कायेत इनाप यानातःगु खः । थौंया बैठकय् सभासद पम्फा भुसाल, प्रदेश सांसद राजकाजी महर्जन व जिवन खड्का, यल महानगरया प्रमुख चिरीबाबु महर्जन, उपमेयर गिता सत्याल लगायत १८, २१ व २२ वडाया वडाध्यक्षलगायत स्थानीय जनतां ब्वति काइगु खँ धाःगु दु ।

म्हीग सांसद पम्फा भुसालया विशेष कुतलय् रक्षा मन्त्री सहित प्रधानसेनापति व स्थानीय पीडिट जनताया दथुइ सहलह जूगु खः । थौंया बैठक नं उकिया निरन्तरता धाःगु दु । म्हीग जूगु सहलह ज्याझ्वलय् सांसद पम्फा भुसालं आउटर रिङरोड व हाइटेन्सन लाइन उगु लागाय् हयेगु ज्याझ्वः गलत जूगु धासें उकियात अनं चीकेमाः धकाः न्ववानादीगु खः ।