ने. सं. ११४४ कौलाथ्व दुतिया -

राजेन्द्रया ‘ईया घःचाः’ पिदन

येँ (नेपालभाषा टाइम्स)- शिक्षा सेवी नापं नेपालभाषाया कार्यकर्ता राजेन्द्र महर्जनं थः मदुम्ह अबुया लुमंतिइ च्वयादीगु म्येँया म्यूजिक भिडियो ‘ईया घःचाः’ वंगु शनिवाः विश्वज्योति हलय् सार्वजनिक जुल । ज्याझ्वलय् मूपाहां वरिष्ठ गायक जुजुकाजी रंजितं थम्हं मांया नामय् न्हापा म्ये हाला तयेधुनागु व अबुया नामय् नं हाले मं दुगु खःसां थःत उगु सौभाग्य चू मलाःगु व थुगु म्येँ न्यने धुंकाः थःत ७० प्रतिशत थः अबु लुमना वःगु खँ धयादिल ।
अथे हे विशेष पाहां नेपालभाषा टाइम्सया कजि नापं साहित्यकार रमेशकाजी स्थापितं थुगु म्येँ व म्यूजिक भिडियोयात कयाः समीक्षा यानादिल ।

पाहां कथं झाःम्ह रेडक्रस सोसाइटी काठमाडौं जिल्लाया पुलांम्ह मन्त्री नापं कलाकार संघरत्न शाक्य, म्यूजिक भिडियो निर्देशक रवि साय्मि, कलाकार कृष्णभक्त महर्जनपिंसं म्यूजिक भिडियो व म्येँयात कयाः चर्चा यानादीगु खः । संगीतकार शिव शाहीं लय् चिनादीगु व गायक सतिस महर्जनं सः बियातःगु थुगु म्येँया म्यूजिक भिडियोय् कलाकार कृष्णभक्त महर्जन, मैंया मुनिकार, धिरज थापा मगर, शान्ति महर्जनपिनि मू भूमिका दुसा बाल कलाकारय् अमिरवराज महर्जन, हृदिक्षा महर्जन, प्रणव महर्जन व शिरसा महर्जनपिंसं अभिनय यानातःगु दु ।

ज्याझ्वलय् म्ये च्वमि महर्जनं म्युजिक भिडियोया पाहां, कलाकार, प्राविधिकपिंत मतिनाया चिं लःल्हानादीगु खःसा म्यूजिक भिडियोया प्रड्युसर दशनारायण महर्जनयात विशेष सुभाय् पौ लःल्हानादीगु खः ।