हवाई रुट बीत अझं आनाकानी

येँ – नेपाःया पानीजहाज चले यायेत थःगु समुद्र छ्यले बीगु आश्वासन बियाच्वंम्ह भारतं नेपाःया हवाइजहाज चले यायेत थःगु सर्गः छ्यले बीत धाःसा अझं आनाकानी यानाच्वंगु दनि । भारत जुयाः नेपाः दुहां वयेगु न्हूगु रुट (एयर इन्ट्री प्वाइन्ट) बीत भारत अझ नं अनिच्छुक जुयाच्वंगु खः ।

तर न्हापा हे बियातःगु रुटय् धाःसा एयर इन्ट्री प्वाइन्ट बीत भारत तयार जूगुलिं सरकार रुटया गथः ब्यन धकाः ढुक्क च्वनाच्वंगु दु । भैरहवाया गौतमबुद्ध अन्तर्राष्ट्रिय विमानस्थलया निंतिं थुगु रुट पाय्छि जुइ धइगु सरकारी अधिकारीतय् दावी दुसां थ्व रुट प्रयाप्त धाःसा मजूगु उड्डयन विशेषज्ञतय् धापू दु । आः नकतिनि भारत भ्रमणय् वंम्ह नागरिक उड्डयन मन्त्री रविन्द्र अधिकारीं भारतीय समकक्षी सुरेश प्रभुलिसे एयर रुटया सहमति जूगु खँ कनादीगु खः । तर उड्डयन अधिकारीतय्सं थुकियात न्हूगु सहमति जूगु मखु धाःगु दु । उड्डयन अधिकारीतय् कथं भैरहवाया रुट बीत भारत न्हापा हे तयार दु । तर भैरहवा व पोखरा विमानस्थल वयेगु निंतिं नेपालगञ्ज व महेन्द्रनगरया रुट पाय्छि जुइ ।

वंगु असारया न्हापांगु वालय् महेन्द्रनगर, नेपालगञ्ज, जनकपुर व विराटनगर रुट थपे यायेगु सम्झौता जूगु खःसां भारत उगु लिखित सहमतिं लिचिलाः नेपाःयात पश्चिमपाखे हवाई रुट बीत अस्वीकार याःगु खः ।

नेपालय् दुहां वइगु अन्तर्राष्ट्रिय उडान भारतया एयर रुट जुयाः सिमरां दुहां वयेमाः । थुकी भारतया हे एयर ट्राफिक कन्ट्रोलरयात न्यनेमाः । अथेहे भैरहवां एयर रुट काःसां नं उगु अवस्था कायम हे जुइ । भैरहवा भारतया सीमा लिक्क लाः । भैरहवां एयर रुट कायेबलय् नं विमान अवतरण यायेगु अन्तिम इलय् तक भारतया हे कन्ट्रोलय् नेपाःया विमान लानाच्वनी । नेपालगञ्ज व महेन्द्रनगरया रुट काये दइगु खःसा थ्व समस्या मदइगु खँ धाःगु दु ।