राजधानीइ पर्यटक बसपार्कया अभाव

येँ – सरकारं सन् २०२० यात नेपाल भ्रमण वर्ष घोषणा याःसां देय्या राजधानी येँय् आःतक पर्यटकीय सवारी साधनया निंतिं बिस्कं हे बसपार्क दयेकेफुगु मदुनि । देय्या आर्थिक मेरुदण्डया महत्वपूर्ण क्षेत्र कथं कयातःगु पर्यटकीय बसया निंतिं बसपार्क मदुगुलिं देय्या प्रमुख पर्यटकीय गन्तव्यस्थलय् वनेत सोह्रखुट्टेया सतकं हे पर्यटकीय बस न्ह्याकेत बाध्य जुयाच्वंगु दु ।

येँनं पोखरा, चितवन, सौराहा, लुम्बिनी, जनकपुर थेंज्याःगु प्रमुख पर्यटकीयस्थलय् वनीपिं स्वदेशी व विदेशी पर्यटकतय् निंतिं पर्यटकीय बस संचालनय् वयाच्वंगु दु । न्हापा जमलय् लाःगु कान्तिपथया सतकय् पर्यटक बस दिकेगु यानाच्वंगु खःसा वंगु असार १६ गते निसें येँ महानगरपालिका, ट्राफिक प्रहरीं पर्यटक बसयात कान्तिपथं चिइकाः सोह्रखुट्टेय् दिकेगु अस्थायी व्यवस्था याःगु खः ।

कान्तिपथ क्षेत्रय् तसकं भीड जुइगु जूगुलिं उगु थासय् पर्यटकीय बसपार्क चिइकागु खँ येँ महानगरपालिकां धाःगु दु । टुरिष्ट बस एशोसियसन अफ नेपाल (टिवान)या अध्यक्ष प्रल्हाद लोहनीं सरकारं घोषणा यानातःगु नेपाल भ्रमण वर्षयात सफल यायेगु खःसा राज्यं पर्यटकीय बसपार्कयात न्हापांगु प्राथमिकताय् तयेमाःगु खँ धयादीगु दु ।

‘सरकारं सन् २०२० य् २० लाख पर्यटक दुत हयेगु धयाच्वंगु दु, तर पर्यटकीय सवारी साधन धाःसा सतकय् दिके मालाच्वंगु दु’ वय्कलं धयादिल । विश्वय् यक्व हे देशय् पर्यटन क्षेत्रया विकासया निंतिं पर्यटक क्वबिइगु सवारी साधनया बिस्कं हे बसपार्क विकास यानातःगु खँ वय्कलं धयादीगु दु ।

कान्तिपथ सतकं चिइकाः सोह्रखुट्टेय् बस दिकेगु याःसां सरकारं राजधानीया प्रमुख पर्यटकीय गन्तव्य जुयाच्वंगु थबहि जःखः हे बसपार्क दयेकेमाःगु खँ नं अध्यक्ष लोहनीं धयादिल । येँय् नं सुरु जुइगु पर्यटकीय बस सुथय् ७ बजे स्वदेशी व विदेशी पर्यटक क्वबिया पोखरा, सौराहा, लुम्बिनी व जनकपुर वनेगु यानाच्वंगु दु ।

महानगरीय ट्राफिक प्रहरी महाशाखां स्वनिगःया ट्राफिक सुधारया निंतिं स्वलाया कार्ययोजना दयेकाः ज्या न्ह्याकाच्वंगु दु । थ्व कार्ययोजनाय् जेब्राक्रसिङ्ग दयेकेगु, बस पकेट निर्धारण यायेगु, फुटपाथ व्यवस्थापन, करिडोर निर्माण, सतक विस्तार थेंज्याःगु ज्या लाः ।

ट्राफिक प्रहरीं वइगु दिनय् पर्यटकीय सवारी साधन व्यवस्थित यायेत पर्यटकीय बसपार्क दयेकेगु निंतिं सरोकारवाला निकायलिसे सहलह याइगु खँ महाशाखाया प्रमुख वसन्तकुमार पन्तं धयादीगु दु । टुरिष्ट बस एशोसियसन अफ नेपाल (टिवान)या महासचिव कृष्ण आचार्यं पर्यटकीय बसपाकृ दयेकेगु निंतिं टिवानं तःक्वः हे सम्बन्धित निकायय् सहलह यायेधुंकूगु खँ कनादिल ।

‘सरकारं पर्यटक बसपार्क दयेकेगु खँय् आवश्यक ध्यान मबिउगुलिं बसपार्क दयेके मफयाच्वंगु खः’ वय्कलं धयादीगु दु । पर्यटन क्षेत्रया विकासया निंतिं पूर्वाधार निर्माण न्हापांगु प्राथमिकता जुइमाःगु वय्कःया धापु दु । पर्यटन विभागया महानिर्देशक डण्डुराज घिमिरें नेपालया पर्यटन क्षेत्रया वि कासया निंतिं पर्यटकीय बसपार्क आवश्यक दुगु खँ धयादिल ।

‘पर्यटकीइ बसपार्क दयेकेगु खँय् सरकार सकारात्मक दु’ वय्कलं धयादिल । थौंकन्हय् येँ नं पोखरा व चितवनया सौराहाया निंतिं थ्यंमथ्यं सछिगः पर्यटकीय बस संचालन जुयाच्वंगु दुसा न्हिं प्यद्वलं मल्याक स्वदेशी व विदेशी पर्यटकतय्त गन्तव्यस्थलय् थ्यंकेगु यानाच्वंगु दु ।

व्यवसायीतय्सं थौंकन्हय् सुथय् ५ बजे निसें ७ बजे तक सोह्रखुट्टेय् पर्यटकीय बस पार्किङ्ग यानाः यात्रुतय्त बस गयेकेगु यानाच्वंगु दु । बसपार्क मदुगुलिं चान्हय्या इलय् बसयात निजी ग्यारेज दिके यंकमाःगुलिं नं यक्व शुल्क पुलेत बाध्य जुयाच्वंगु दु ।

सम्बन्धित बुखँ

LEAVE YOUR COMMENTS