सरकारं व्यवसायीतय् सल्हाकार समूह दयेकीगु

येँ – सरकारं आः उद्योगी व्यवसायीतय्त दुथ्याका छगू सल्लाहकार समूह गठन यायेत्यंगु दु । प्रधानमन्त्री केपी ओलीं शनिवाः नेपाल उद्योग परिसंघया झिंन्याक्वःगु दँमुँज्याया उलेज्या यानादिसें सरकारया निंतिं सल्हा बीगु निंतिं उद्योगी व्यवसायीतय् छगू सल्लाहकार समूह गठन यायेत्यनागु खँ धयादीगु खः ।

ज्याझ्वलय् न्ववानादिसें प्रधानमन्त्री ओलीं उद्योगयात प्रविधिमैत्री दयेकाः गुणस्तरीय उत्पादन यायेत प्रोत्साहित याइगु खँ नं धयादीगु खः । स्वच्छा, पारदर्शिता, कानुनया राज व अवसरया समतापूर्ण ढंगं वितरण जुल धाःसा जक समृद्धि चूला धयादिसें वय्कलं ६० प्रतिशत जनसंख्या ज्या यानाः नयेफइगु जुलकि आर्थिक विकासया निंतिं तःधंगु अव सर जुइगु खँ धयादिल ।

प्रधानमन्त्री ओलीं सरकार निजी ख्यःलिसे सहकार्य यानाः देय्यात उद्योगमैत्री दयेकेत इच्छुक दुगु स्पष्ट यासें धयादिल, ‘झीसं निजी ख्यःलिसे सहकार्य यायेगु जुइ, तर उद्योग मिया नयेगु निंतिं मखु, उद्योग चायेकेगु निंतिं खः ।’

निगुलिं जःलाखःला देय्या विशाल जनसंख्या नेपाःया उपयुक्त बजाः जूगुलिं निर्यातजन्य वस्तुया उत्पादन यायेत नं वय्कलं व्यवसायीतय्त इनाप यानादीगु खः । थ्व झ्वल् परिसंघं प्रकाशन याःगु आर्थिक समृद्धिया मार्गचित्र व आवश्यक कानुनी सुधार सफू नं विमोचन यानादीगु खःसा थीथी व्यवसायीपिंत सम्मान नं यानादीगु खः ।