चि उत्पादन याःगु सेन्चुरी मसालायात कारवाहीया माग

येँ (नेपालभाषा टाइम्स) – राष्ट्रिय उपभोक्ता मञ्चं अवैध व गैरकानुनी रुपं चि उत्पादन यानाः मिया वयाच्वंगु दुगड समूहयात कारवाही यायेत माग याःगु दु । मञ्च प्रधानमन्त्रीयात छगू ज्ञापनपत्र छ्वयाः थ्व माग याःगु खः ।

नेपालय् आयोडिनयुक्त चि मिइगु अधिकार साल्ट ट्रेडिबयात जक बियातःगु जूसां दुगड समूहं संचालन याना वयाच्वंगु दुगड स्पाइस एण्ड फुड प्रोडक्ट प्रालिं सेन्चुरी स्प्रिंकलर्स टेबल साल्ट नामं चि उत्पादन यानाः मिया वयाच्वंगु खँ न्ह्यथँसें थ्व चि उत्पादन यायेत नं खाद्य तथा प्रविधि गुण नियनत्रण विभागं कायेमाःगु अनुमति तकं कयामतःगु खँ मञ्चं धाःगु दु ।

थ्व चि १०० ग्रामया हे ३२ तकां मिया वयाच्वंगु दु। साल्ट ट्रेडिबं मिया वयाच्वंगु चि धाःसा किलोया मुक्कं २० तकां न्यायेगु दु। नेपाःया कानुनं हे चिइ तयेगु आयोडिनया गुणस्तर निर्धारण यानातःगु दुसां दुगडं उत्पादन याःगु चिइ थुकिया बांलाक जानकारी तकं बियामतःगु खँ धाःगु दु ।