नीन्हु दुने वैदेशिक रोजगार सेवा अनलाइनपाखें

येँ – सरकारं वइगु नीन्हुया दुने वैदेशिक रोजगार सम्बन्धी फुक्कं सेवा अनलाइनपाखें बीगु जूगु दु। श्रम मन्त्री गोकर्ण विष्टं प्रतिनिधिसभाय् सम्बोधन यासें नीन्हुया दुने वैदेशिक रोजगारलिसे सम्बन्धित फुक्कं कथंया सेवा अनलाइनपाखें बीगु घोषणा यानादीगु खः।वय्कलं कुटनीतिक नियोग, श्रम कार्यालय, वैदेशिक रोजगार विभाग, मेनपावर कम्पनी, इन्स्योरेन्स कम्पनीयात अनलाइनपाखें स्वायेगु योजना दयेकादीगु दु।

थुकिं ठगी निन्त्रयण, सेवा प्रवाहय् गुणस्तर वृद्धि जुइगु खँ वय्कलं कनादिल। सम्बोधनया झ्वलय् वय्कलं विदेशय् थीथी मुद्दा लानाच्वंपिं नेपाःमि ज्यामिया मुद्दा नं सरकारं ल्वायेगु खँ धयादीगु दु। सरकारं वैदेशिक रोजगारया झ्वलय् थीथी देय्या जेलय् लानाच्वंपिनिगु मुद्दा ल्वायेगु व्यवस्था यायेत्यंगु खः। थौंकन्हय् थीथी देय्या जेलय् ३३५ म्ह नेपाःमि जेलय् लानाच्वंगु दु।वैदेशिक रोजगारय् वनेगु झ्वलय् चालु आर्थिक दँय् जक झिंच्यागू देशय् ७७७ म्ह नेपाःमिं ज्यान गुमे यायेमाःगु दु।