वैशाख १ निसें शेयर लगानीकर्तातय्त अनिवार्य प्यान

येँ – शेयर कारोवार यायेगु निंतिं वइगु वैशाख १ गते निसें अनिवार्य प्यानय् दर्ता जुइमाःगु जूगु दु । नेपाल स्टक एक्सचेञ्जं निगूगु बजारय् शेयर कारोवार यायेगु निंतिं सकलें लगानीकर्तातय्सं अनिवार्य प्यान नम्बर कायेमाःगु सुचं बुधवाः पितबिउगु खः । प्यान नं. कायेगु निंतिं स्टकं हे सहजीकरण नं यानाबिइगु जूगु दु ।

थुकिया निंतिं नेप्से ज्याकुथिइ अस्थायी लेखा नम्बर दर्ता सहजीकरण डेस्क संचालन याइगु जूगु दु । मेखे नेप्सें प्यान अनिवार्य यायेगु सुचं पितबीवं बुधवाः शेयर बजाः नं अप्वः कुहां वंगु दु । बुधवाः जक नेप्से परिसूचक ७.११ अंकं कुहां वंगु खः । लगानीकर्तातय्सं प्यान नं. कायेमाःगु जुल धाःसा निगूगु बजारय् प्रभाव लाकी धासें तत्काल कार्यान्वयन मयायेत धयाच्वंगु खः ।

अनिवार्य प्यानया सुचं वयेवं बुधवाः शेयर बजाः थप कुहां वन

थुकिया निंतिं लगानीकर्तात आन्दोलन यायेत नं तयार जुयाच्वंगु दु । प्यान लागू यायेगु सम्बन्धय् नेप्से व लगानीकर्तातय् दथुइ जूगु सहलहय् लगानीकर्तातय्त प्यान बारे बुझे यायेधुंकाः जक कार्यान्वयन यायेगु निर्णय जूगु खःसां नेप्सें आः धितोपत्र बोर्डया निर्देशन कथं वैशाख १ गते निसें लागू यायेगु सुचं बिउगु खः ।

धितोपत्र बोर्डं वंगु कात्तिक १२ गते हे बजेटय् व्यवस्था यानातःकथं लगानीकर्तातय्त अनिवार्य प्यान दर्ता याकेगु निंतिं नेप्सेयात निर्देशन सहित पौ छ्वःगु खः । तर नेप्सें सहलह यानाः जक लागू यायेगु धासें छुं ई दिकातःगु खः ।