तरकारी न्याः मदयाः किसानतय्त मार

ख्वप – विश्वन्यंकं कोरोना भाइरस न्यना वनाच्वंगु झ्वलय् थुकिया प्रभाव ख्वपया किसानतय्त नं लाःगु दु । कोरोना त्रासया कारणं उपभोग्य ज्वलंया अभाव जुइगु व भाः थहां वनीगु चिन्ता जुयाच्वंगु इलय् थनया किसानतय्सं धाःसा दंगु भावं तरकारी मी मालाच्वंगु दु ।
थनया छम्ह किसान सरोज महर्जनं धयादी, ‘कोरोनाया सन्त्रासं कृषि ख्यःयात नं बांमलाक समस्याय् लाकूगु दु । तरकारी तसकं दंक मियाच्वनागु दु, अय्सां मचू । मनूत यक्व स्वनिगलं पिहां वन, ततःधंगु होटल बन्द जुल अले तरकारी नइपिं मनूत हे मंत ।’

पुस्तौंनिसें बुँज्या याना वयाच्वंपिं महर्जनया मेपिं निम्ह दाजुकिजा तुल्सीराम व विकेस नं थ्वहे ज्याय् दु । वय्कःपिनि मू उत्पादन धयागु चसू, पलः, धन्या, गाजर व वाउँगु प्याज खः । थुपिं तरकारी आः तसकं दंगु भावं मी मालाच्वंगु दु । महर्जनं धयादी, ‘थौंकन्हय् जिपिं तसकं द्यापनय् दु । मस्तय् ब्वनेगु खर्च उठे यायेगु ला त्वःता हे छ्वये, नयेत्वनेत तकं समस्या जुइधुंकूगु दु ।’

छगू इलय् धन्या किलों हे सछि तका तक तूगु खः, तर आः झितकां नं न्याः मदुगु खँ वय्कलं धयादिल । ‘होटल बन्द, विदेशीत मदु, यंकाः जक छु याये धकाः व्यापारीतय्सं धाइगु’ वय्कलं कनादिल ।

थिमि नगदेश व मनोहरा क्षेत्रया किसानतय्सं दँय् न्याक्वः तक वाउँगु तरकारी उत्पादन याइ । गाजर धाःसा दँय् निक्वः सयेकी । गुगुं इलय् किलोया ६० तका थ्यंगु गाजर थौंकन्हय् च्यातकां मी मालाच्वंबलय् गुकथं छेँ खर्च चले यायेगु धयागु चिन्ता जुयाच्वंगु दु ।

तुल्सीराम महर्जनं धयादी, ‘कृषि अनुदान वल धाःसा फुक्कं दुनें दुनें हे मिले याइ । दथुइ हे तनावनी, सुनां नल छुं सीमखु । अनुदान ला त्वःता हे छ्वये बाली यायेगु इलय् पुसा तकं सुचुका बी, अले थिकेक न्यायेत बाध्य जुइ ।’

देसय् दूरदर्शी नेतृत्व मदुगु कारणं उत्पादन जुइगु बुँ फुक्कं छेँ व लँय् परिणत जुया वनाच्वंगु दुःख नं वय्कलं प्वंकादिल । मेपिनिगु जग्गा बालं कयाः बुँज्या यायेत तसकं थाकुगु व मेहनत जक सितिकं वनीगु अनुभव यानाच्वंपिं महर्जन परिवार थःपिं हे थौंकन्हय् जग्गा मियाः पसः तयेमाल ला धयागु बिचारय् दु । थःपिनिगु भुखाचं दुंगु छेँया तकं अनुदान कायेमखंगु खँ कनादिसें सरोज महर्जनं धयादी, ‘भुखाय् लिपा ४० लाख फुकाः छेँ दना,तर इन्जिनियरं छेँ दयेकू मिले मजू धकाः अनुदान बीत हे माने मजुल ।’