दिगो विकासया निंतिं सम्पत्ति शुद्धीकरण जुइमाः

येँ – अर्थमन्त्री डा. युवराज खतिवडां दिगो विकास व वित्तिय सुशासनया निंतिं सम्पत्ति शुद्धीकरणय् ध्यान बीमाःगु खँ धयादीगु दु ।
सम्पत्ति शुद्धीकरणया सम्बन्धय् एशिया प्रशान्त क्षेत्रीय समूहया २१ क्वःगु बैठकया म्हिगः उलेज्या यासें वय्कलं उगु खँ धयादीगु खः । वय्कलं वित्तिय अपराध व आतंकवादयात परास्त यायेत नं सम्पत्ति शुद्धीकरणय् बःबीमाःगु खँ धयादीगु दु ।

नेपालय् वंगु शनिवाः निसें न्ह्याःगु उगु बैठकय् एपिजी सदस्य देश, पर्यवेक्षक देश व विश्व बैंक लगायतया ५ सय प्रतिनिधिं ब्वति कयाच्वंगु दुसा बैठक वइगु शुक्रवाः तक न्ह्याइगु खँ धाःगु दु ।

उगु बैठकय् वित्तिय अपराध व आतंकवादय् छ्यले फइगु अवैध ध्यबायात गुकथं सामूहिक रुपं पनाः आर्थिक समृद्धि हासिल यायेगु बारे सहलह जुइगु खँ धाःगु दु । लिसें सम्पत्ति शुद्धीकरणय् सदस्य देशं यानाच्वंगु कुत व अनुभव नं आदान प्रदान यायेगु ज्या जुइगु खँ धाःगु दु ।