
म्हिगः २२ अप्रिल । दँय्दसं २२ अप्रिल कुन्हु नेपाल कम्युनिष्ट पार्टीया बुदिं हनी । लेनिनया जन्म जूगु दिन लाकाः भारतय् नेपाल कम्युनिष्ट पार्टी स्थापना जूगु खः । पुष्पलाल श्रेष्ठ संयोजक जुयाः नीस्वंगु उगु कम्युनिष्ट पार्टी दुने अबले नरबहादुर कर्माचार्य, निरञ्जनगोबिन्द बैद्य, नारायणविलाश जोशी सदस्य कथं च्वनादीगु खः । थज्याःगु अवस्थाय् देसय् प्रजातन्त्र मदुगु ई जुयाः भारतया बनारसय् उपिं मुनाः थुकथं कम्युनिष्ट पार्टी नीस्वन ।
थौं नेपाल कम्युनिष्ट पार्टी दुने द्वलंद्वः व लखौं सदस्य थ्यने धुंकल । अथे खःसां न्हापा २००६ सालय् नीस्वंगु उगु हे कम्युनिष्ट पार्टीया आधारय् थीथी तह तप्काया विभाजन लिपा नं आः तक नेपालय् कम्युनिष्ट आन्दोलन न्ह्यज्यानाच्वंगु दु । कम्युनिष्ट पार्टीया मू उद्देश्य देसय् सर्वहारा वर्गया शासन सत्ता कायम यायेगु खः । उकिया लागिं कम्युनिष्ट पार्टीं स्थापना कालंनिसें आः तकं थीथी कथंया आन्दोलन, संघर्ष व क्रियाकलापत न्ह्याका वयाच्वंगु दु ।
सर्वहाराराज सम्भव दु धइगु वाःचायेकाःलि हे जक नेपालय् कम्युनिष्ट पार्टी स्थापना जूगु खः । लेनिनं रुसी समाजवादी क्रान्ति यानाः सोभियत संघ गठन याना क्यंगु सछिदँ पुले धुंकल । अन सन् १९१७ य् क्रान्ति सफल जूगु खः । खय्त ला आः रुसय् समाजवादी शासन ब्यवस्था पतन जुइधुंकूगु दु । अथे खःसां विश्वया स्वब्वय् छब्व जमीन दुगु निगू महादेसय् न्यनाच्वंगु विश्वया हे दकलय् तःधंगु देसय् अबले स्थापना जूगु कम्युनिष्ट शासन पद्धति संसारया लागिं हे अनुकरणीय जुयाबिल ।
आः देसय् बहुमत कम्युनिष्टतय्गु दु । अझ वर्तमान सरकार ला दुई तिहाई स्वयां अप्वःसिया समर्थनय् कम्युनिष्ट धाःपिनिगु सरकार खः । थ्व इलय् थःपिनि क्षमता थुइकाः यदि आन्दोलन व क्रान्तिया लागि पलाः ल्ह्वनेगु खःसा थ्व देसय् क्रान्ति असम्भव धाःसा मखु ।
थ्व नं छगू ऐतिहासिक रेकर्ड खः । खय्त ला पेरिस कम्युन धकाः छुं ई तक फ्रान्सया पेरिसय् नं कम्युन लागू यायेगु ज्या जूगु इतिहास दु । तर जनता सचेत मजुइकं हतियारया भरय् बलजफ्ति लागू याःगु उगु शासन पद्धति छुं ई जक टिके जुल । अस्थायी जुल । सन् १९१७ य् नीस्वंगु सोभियत संघ नं अन दुने थीथी कथंया की जन्म जूगु हे कारणं सन् १९९० य् थ्यंकाः पतन जूवन । आः नं अन कम्युनिष्ट आन्दोलन धाःसा उलि हे चर्कों ढंगं न्ह्यानाच्वंगु दनि ।
संसारन्यंकं हे कम्युनिष्ट ध्वाँय् ब्वयेकेगु अबले रुसया नीति खः । तर व ज्या सफल मजू । पूर्वी यूरोप, क्यूवा, भियतनाम, लाओस लगायत विश्वया छुं छुं देसय् धाःसा कम्युनिष्ट शासन पद्धति कायम हे जुयाच्वन । आः नं विशाल देय् चीन, क्यूबा, उत्तर कोरिया थेंज्याःगु देसय् कम्युनिष्ट शासन पद्धति निरन्तर रुपं कामय जुयाच्वंगु दनि । तर नेपालय् कम्युनिष्ट पार्टी स्थापना जूगु ७० दँ थ्यनेधुंकलं नं थन कम्युनिष्ट क्रान्ति वा सर्वहारा अधिनायकवाद धाःसा लागू जुइ फयाच्वंगु मदु ।
थुकिया मू कारण धइगु थ्व देसय् च्वंपिं आपालं कम्युनिष्ट पार्टी दुनेया नेतात स्वार्थी, सत्तालोलुप व थः जक तःधं छुनाः मेपिंत कम्युनिष्ट धकाः गणना हे मयायेगु प्रबृत्तिं खः । थथे धइगु डा. केशरजंग राजमाझी थेंज्याःपिं दरवारिया कम्युनिष्ट पार्टी तकं छुं इलय् नेपाल कम्युनिष्ट पार्टी दुने महासचिव जूवन । राधाकृष्ण मैनाली थेंज्याःपिं खने मदयेक कम्युनिष्ट जुयाच्वंपिं दरवारय् समर्पित जूवन ।
आः नं कम्युनिष्ट पार्टीया नामय् पूँजीवादी पार्टीतय्सं हे थःत साथ बीके कथं कम्युनिष्ट नां तयाः कम्युनिष्ट आन्दोलनयात लिउने लाकेगु ज्या धाःसा निरन्तर रुपं याना हे वयाच्वंगु दु । लेनिन जयन्ती लाकाः स्थापना जूगु थ्व कम्युनिष्ट पार्टीया आधार सर्वहारा जनता खः । तर थन ला आपालं कम्युनिष्ट पार्टीतय् आधार आः सर्वहारा वर्ग वा मजदुर किसानत मखये धुंकल । धनी, साहु महाजन, भट्टा साहुनिसें कयाः थीथी कथं स्कुल कलेज चले यानाः नयेफुपिं धनाढ्यत उमि आधार जुयाच्वंगु दु ।
एमाले व एकीकृत माओवादी दुने स्वयेगु खःसा केन्द्रंनिसें मेमेगु निकायय् च्वनीपिं मनूत ध्यबा तये मफयेकं कम्युनिष्ट पार्टीइ थातं च्वने फइगु स्थिति हे मदये धुंकल । अले उमिसं सर्वहारा वर्गया लागिं सेवा याइ वा उद्योगपति, तस्कर व धनीमानीया लागिं हे सेवा याइगु खः अथें हे अनुमान यायेफुगु खँ जुल । सर्वहारा वर्गया नेतृत्वय् रुस, चीन, लाओस, भियतनाम व क्यूवाय् क्रान्ति जूगु खः । तर नेपालय् उलिमछि कम्युनिष्ट पार्टी वल वन तर आः तकं क्रान्तिया सम्भावना झन्झन् न्यून जुजुं वनाच्वंगु दु ।
थ्व धारणां नं जनता निराश जुयाच्वंगु स्थिति दु । मेमेगु देसय् कम्युनिष्ट पार्टी स्थापना जूगु नीदँ पीदँ दुबलय् हे आन्दोलन व क्रान्ति यानाः देसय् कम्युनिष्ट झण्डा ब्वयेकूगु इतिहास दु । क्यूवा, चीन व स्वयम न्हापांखुसी समाजवादी देय् कायम जूगु रुस वा सोभियत संघ स्थापनाकालय् नं उलिमछि पुलांगु कम्युनिष्ट पार्टीया इतिहास मदु । तर झीथाय् ७० दँ तक कम्युनिष्ट आन्दोलन व कम्युनिष्ट गतिविधि न्ह्यज्यातं नं सफल क्रान्ति धाःसा अझ गुलि तापाइगु खः धाये थाकुनि ।
पुष्पकमल दाहाल प्रचण्डया कथं ला निसःदँ थुखे कम्युनिष्ट शासन नेपालय् सम्भव हे मदु । थथे थीथी कथं देसय् न्ह्यानाच्वंगु कम्युनिष्ट आन्दोलनयात दुवालाः स्वयेगु इलय् थन सही नेतृत्व व सही कम्युनिष्ट पार्टीया अभावं यानाः हे जक देसय् आन्दोलन व क्रान्ति सफल जुइ मफुगु खः । कम्युनिष्ट पार्टी स्थापना जूगु सातिगु वर्ष हे थन प्रजातन्त्र वल । अबले कम्युनिष्ट पार्टीपाखें प्यम्ह हे जक सांसद त्याःगु रेकर्ड दु ।
आः देसय् बहुमत कम्युनिष्टतय्गु दु । अझ वर्तमान सरकार ला दुई तिहाई स्वयां अप्वःसिया समर्थनय् कम्युनिष्ट धाःपिनिगु सरकार खः । थ्व इलय् थःपिनि क्षमता थुइकाः यदि आन्दोलन व क्रान्तिया लागि पलाः ल्ह्वनेगु खःसा थ्व देसय् क्रान्ति असम्भव धाःसा मखु । सही नेतृत्व व सही नीतिया अभावं हे झी न्ह्याथाय् नं लिपा लाःवनीगु खः ।
थःगु मर्यादा, इज्जत व सिद्धान्तयात ध्यानय् तयाः उकी कट्टर हे जुयाः वा प्रतिवद्ध जुयाः ज्या याना क्यनेगु खत धाःसा क्रान्ति यायेगु असम्भव ख हे मखु । म्हिगः हे रुस, चीन, क्यूवा, उत्तर कोरिया व भियतनामया थीथी क्रान्तिकारी इतिहासयात स्वस्वं वनेगु खःसा आः नं नेपालय् क्रान्ति सम्भव दु । उकिया लागिं नां जक कम्युनिष्ट जुयाः ज्या पूँजीवादी गतिविधिपाखें वनाच्वंगु वर्तमान कम्युनिष्ट पार्टीया चरित्रय् धाःसा हिउपाः महसें मगाः ।
LEAVE YOUR COMMENTS