कलिउडया ल्याय्म्ह पुस्ता
कलिउड धका धयातःगु खँय्भाय्या फिल्म ख्यलय् आः ल्याय्म्ह पुस्ताया स्टारतसें थाय् कायेधुंकूगु दु । छगु इलय् बाज्यः वनेधुंकूपिं कलाकारपिंसं ल्याय्म्ह जुयाः म्हितीगु खःसा आः वयाः बाज्यः वंपिं कलाकारपिनिगु थाय् उमिगु उमेरयात ल्वइकथंया भूमिकाय् जक तक्यंगु दु ।
आः नकतिनिया हे खँ खः की “प्रेमगीत ३”नांयागु फिल्मया निंतिं राजेश हमालयात छगू अज्याःगु हे साइड रोल म्हितेत अफर याःबलय् वं अस्वीकार याःगु खँ कलिउडय् बय्बय् जुल । न्यय्न्यादँ पुलेधुंकूम्ह राजेश हमालयात उगु फिल्मय् बाज्यः वनेधुंकूम्ह पात्रया रूपय् न्ह्यब्वयेगु ग्वसाः जूगु खः तर वं अस्वीकार याःबले आः उगु रोलय् शिव श्रेष्ठ म्हितीगु जूगु दु ।
थ्व फिल्मया हिरो प्रदिप खड्का खः । प्रदिप खड्का धयाम्ह ल्याय्म्ह पुस्ताया लोकंह्वाना च्वंम्ह हिरो खः । थौंकन्हय् २०÷२२ लाख तका तक पारिश्रमिक काइम्ह हिरो खः । थौंकन्हय् दकले अप्वः लोकंह्वाःम्ह हिरो अनमोल के.सी. खः । वयात ४०÷५० लाख तका तक बिइत तयार धाइपिं दुु धाइ ।
अनमोल के.सी.या “कृ” व “क्याप्टेन” फिल्मं आस यानातःकथं व्यापार मयाबलय् धाःसा वयात भतिचा घाः लाःथें जूगु खः । तर “ए मेरो हजुर ३” या व्यापार बांलाःबलय् वयागु स्थीति स्थीर जुल । थगुने वयात निगू फिल्मं घाः लाकूगुलिं थौंकन्हय् अनमोलं न्हूगु फिल्मय् ल्हाः धाःसा मतःनि । उलि याकनं तइगु नं खनेमदु ।
ल्याय्म्ह पुस्ताया मेम्ह लोकंह्वाम्ह हिरो पल शाह खः । तर वयागु फिल्म धाःसा उलि हिट जूगु मदुनि । थगुने वयागु “शत्रु गते” हिट जूगु खः तर उगु फिल्म हिट जूगुया कारण व मखसे दिपकराज गिरी व दिपाश्री निरौलाया ज्वःया नापनापं हरिवंश आचार्यया मेन रोल खः । उकिसनं थुगुसी पिदंगु “वीरविक्रम २” नांयागु फिल्मया व्यापार ताःमलाःबलय् वयागु पलाः छ्वासुल धयाहःगु दु ।
थ्व हे “वीरविक्रम २” फिल्मया मेम्ह हिरो नजीर हुसेन नं खय्त ला ल्याय्म्ह पुस्ताया लोकंह्वाःम्ह कलाकार खः । विशेष यानाः वयात एक्टिङ्ग बांलाःम्ह कलाकारया रूपय् कयातःगु दु । खास यानाः साइड रोल जक म्हिता वयाच्वंम्ह नजीर हुसेनं थगुने “तिमिसँग” नांयागु फिल्मय् हिरो जुयाः म्हितूगु खः ।
ल्याय्म्ह पुस्ता दथुइ तसकं लोकंह्वाःम्ह हिरोइन साम्राज्ञी राज्यलक्ष्मी शाहलिसे हिरो जुयाः म्हितूगु “तिमिसँग” फ्लप हे जूगु फिल्म खः । थ्व फिल्मया मेम्ह हिरो आकाश श्रेष्ठ खः ।आकाश श्रेष्ठयात अनमोल के.सी.या विकल्पया रूपय् काइपिं यक्व दु । अनमोलया मां सुष्मिता बमजनं हे आकाशयात अनमोलया विकल्पया रूपय् थःगु होम प्रोडक्सन “म त तिमै्र हुं ” फिल्मय् हिरोया रूपय् डेब्यु याकूगु खः ।
थ्व फिल्म ला खास हे चले मजुल, तर हिरोया रूपय् आकाश श्रेष्ठयात धाःसा आपाःसिनं ययेकल । आकाश श्रेष्ठया “ब्ल्याक” नांयागु फिल्म नं फ्लप जूगु फिल्म खः तर वयागु “रामकहानी” धाःसा हिट जुल । थ्व फिल्म हिट जूबले “रामकहानी”या हिरोइन पुजा शर्मालिसे वयागु जोडी नं हिट जुल ।
आकाश व पुजा नापं म्हितूगु मेगु फिल्म “सम्हालिन्छ मन कसरी”या शुटिंग क्वचाये धुंकूगु दुसा थ्व ज्वः आः हाकनं “पोइ प¥यो काले” फिल्मय् खनेदयेकः वयेत्यंगु दु । ल्याय्म्ह पुस्ताया दथुइ पुजा शर्मा नं लोकंह्वाम्ह हिरोइन कथं चर्चा यानातःगु दु तर वयात उलि बांलाःम्ह कलाकार धाइमखु ।
ल्याय्म्ह पुस्ताया चर्चा जुयाच्वंसां
ल्याय्म्ह पुस्ताया कलाकारपिंसं थःगु पलाः उलि क्वातुके फुगु धाःसा खनेमदुनि । हिरोत मध्ये अनमोल व प्रदिप अले हिरोइनत मध्ये साम्राज्ञी छम्हेसिनं हे जक थःगु पलाः क्वातकूगु खनेदु
हिरोइनत मध्ये ल्याय्म्ह पुस्ता दथुइ दकलय् लोकंह्वाःम्ह साम्राज्ञी आरएल शाह हे खः । साम्राज्ञीयात थौंकन्हय् दकलय् अप्वः पारिश्रमिक काइम्ह हिरोइन कथं चर्चा यानातःगु दुसा छगू इलय् दकलय् अप्वः दां काइम्ह हिरोइन जुयाच्वंम्ह नम्रता श्रेष्ठ धाःसा ज्या मदया सुम्क च्वनाच्वंगु दु ।
थगुने नम्रताया “प्रसाद” नांयागु फिल्मया चर्चा बांलाक हे जुलसा आः वयागु ल्हाती “जायरा” नांयागु छगूयां छगू जक फिल्म ल्यंदनि । थौंकन्हय् ल्याय्म्ह पुस्ता दथुइ लोकंह्वानाच्वंम्ह हिरोइन आँचल शर्मा छम्ह नं खः । आँचलया थगुने “शत्रुगते” व थुगुसी “दालभात तरकारी” हिट जूगु फिल्म खःसां थ्व फिल्म हिट जूगुया लबः धाःसा वयात वंगु मदु ।
“दालभात तरकारी” या हे मेम्ह हिरोइन वर्षा राउत नं ल्याय्म्ह पुस्ताया लोकंह्वाम्ह हिरोइन खः । थुगुसी वयागु सोलो हिरोइनया रोल दुगु “जात्रैजात्रा” हिट जूगु दुसा थगुने नगुने “छक्का पञ्जा” सिक्वेलय् वयागु बांलागु हे रोल दुगु खः । “वीरविक्रम २”या हिरोइन वर्षा सिवाकोटी नं थौकन्हय्या ल्याय्म्ह पुस्ताया नांजाःम्ह हिरोइन खः ।
“छक्कापञ्जा” सिक्वेलया हे मेम्ह हिरोइन प्रियंका कार्की नं ल्याय्म्ह पुस्ताया नांजाःम्ह हिरोइन खः । “छक्का पञ्जा” व “नाईं नभन्नु ल” लोकंह्वाःगु सिक्वेल फिल्मया हिरोइन प्रियंकाया मेमेगु फिल्म धाःसा उलि लोकंह्वाःगु खनेमदु । थुगुसी वयागु “प्रेमदिवस” फ्लप जुल । थ्व फिल्मय् वया हिरो आयुष्मान देशराज जोशी खः ।
प्रियंकाया मतिनमिया रूपय् चर्चाय् वयाच्वंम्ह आयुष्मानयात नं ल्याय्म्ह पुस्ताया चर्चित हिरो कथं कयातःगु खःसां वयागु नं फिल्म हिट जूगु खनेमदुनि । थगुने प्रियंकालिसे हे म्हितूगु “चंगाचेट” छगू धाःसा भचाभचा चले जूगु फिल्म खः । थगुने हे पिहां वःगु प्रियंकाया फिल्म “बटरफ्लाइ” या हिरो आर्यन अधिकारीयात आर्यन सिग्देलया थाय् काइम्ह हिरो धकाः बय्बय् याःगु खः तर अथे जुइमफुत ।
“बटरफ्लाइ” ला फ्लप हे जुल अले बलिउडया नांजाम्ह कमेडी स्टार राजपाल यादवया तकं मेनरोल दुगु हिन्दी फिल्म “कडके कमाल के” फिल्मं नं छुं कमाल क्यने मफुत । थ्व फिल्मय् आर्यन अधिकारीलिसे हिरोइन जुयाः म्हितूम्ह नीता ढुङ्गाना खः ।“पञ्चायत” नांयागु फिल्मय् बांलाक्क अभिनय याना आपालं अवार्ड त्याकेत ताःलाम्ह नीता ढुङ्गानाया फिल्म खास हे चले मजूसां हिरोइनया रूपय् वयागु यात्रा धाःसा बांलाक हे चले जुयाच्वंगु दु ।
बरु वया समकालिन हिरोइन केकी अधिकारी धाःसा थौंकन्हय् उलि खनेमदयेधुंकल धाःसां पाइमखु । केकीं फिल्मय् थःगु पलाः क्वातुकेत थगुने “कोहलपुर एक्सप्रेस” नांयागु फिल्म नं दयेकल । तर थ्व फिल्म नं चले मजुल । थौंकन्हय् ल्याय्म्ह पुस्ता दथुइ लोकंह्वाना च्वंम्ह मेम्ह हिरोइन धम्ह स्वस्तिमा खडका खः ।
“दुई रूपैयाँ” नांयागु फिल्मया म्येँ “कुटुमा कुटुु” अतिकं लोकंह्वाःबलय् तसकं चर्चाय् वःम्ह स्वस्तिमाया चर्चा अप्वः जूसां फिल्म धाःसा उलि हिट जूगु मदुनि । थगुने वयागु “बुलबुल” नांयागु फिल्मयाबारे यक्व हे चर्चा जुल । फिल्मया तारीफ नं जुल । स्वस्तिमाया अभिनयया नं तारीफ हे जुल , तर फिल्म धाःसा फ्लप जुल ।
थुकथं ल्याय्म्ह पुस्ताया चर्चा जुयाच्वंसां ल्याय्म्ह पुस्ताया कलाकारपिंसं थःगु पलाः उलि क्वातुके फुगु धाःसा खनेमदुनि । हिरोत मध्ये अनमोल व प्रदिप अले हिरोइनत मध्ये साम्राज्ञी छम्हेसिनं हे जक थःगु पलाः क्वातकूगु खनेदुुसा आः वया न्हूपिं हिरोइनय् “ए मेरो हजुर ३”या हिरोइन सुहाना थापापाखे आसकुति मिखा ब्वयाच्वंगु दुसा हिरोत मध्ये “ए मेरो हजुर २”या हिरो सलिनमान बनियायात नं भविष्यया स्टार धायेगु यानातःगु दु ।
हतपत्त फिल्म म्हितेत मानेमजुइम्ह सलिनया निगूगु फिल्म “यात्रा ः ए म्युजिकल भ्लग” हिट जुइमफुत । थ्वहे फिल्मय् सलिनलिसे हिरोइन जुया खनेदयेकः वःम्ह मलिका महतं थुकी बांलाक हे अभिनय याना क्यंसां वयागु ल्हातिइ मेगु फिल्म लाःगु मदुनि । बरु अनमोल के.सी. लिसे “क्याप्टेन”य् डेब्यु याःम्ह उपासना सिंह ठकुरीया ल्हाती “कबड्डी कबड्डी कबड्डी” थेंज्याःगु तसकं बय्बय् जुयाच्वंगु फिल्म लाःवगु दु ।
न्ह्याम्हेसियागु ल्हाती न्ह्याथेज्याःगु छगू निगू फिल्म लाःवःसां थःगु पलाः सुथां लाकेत थःगु प्रतिभा बांलाक न्ह्यब्वये फयेमा । अलेजक फिल्म ख्यलय् थःगु पलाः क्वातुके फइ, मखु धइगु खःसा छगू निगू फिल्म धुंकाः अनवं थनवं मदयेक तनावनी ।
LEAVE YOUR COMMENTS